A triatleta Miriam Casillas disputará esta fin de semana en Hamburgo dous campionatos do mundo: o individual e o mundial por relevos mixtos. A internacional do Triatlón Ferrol afronta con ilusión a novidade provocada pola pandemia de celebrar o mundial individual nun só día, en lugar de premiar a triatleta máis regular da temporada.
Baixo o modelo da regularidade, en 2020 Casillas logrou ser 37ª nas Series Mundiais. Non menos importante será o mundial por relevos mixtos, xa que será das poucas oportunidades nas que a selección española poda competir xunto ao máximo nivel antes da estrea deste formato nos Xogos Olímpicos de Toquio.
Para competir en Alemaña, Miriam Casillas deberá dar negativo nunha PCR realizada antes de viaxar e, de novo, noutra proba de Covid-19 a realizar en Hamburgo.
