Este venres 4 de setembro sobraba a expectación producida pola aglomeración da veciñanza lindeira e os viandantes que pasaban pola Praza de Armas cando, o mítico establecemento que antaño ocupaba Zara, volveu a abrir as súas portas de novo ao público, esta vez para dar acubillo as perfumerías Avenida e Neobel. De feito, esta última franquicia pechou o seu anterior establecemento situado no número 36 da rúa Real para darlle a benvida á nova.
A macrotenda de Neobel e Perfumerías Avenida
O grupo salmantino Recio, que ten máis de 115 anos de historia, conta con máis de 200 tendas e máis de 950 empregados por todo o territorio nacional, é o propietario de ambas as dúas marcas sendo unha das maiores cadeas de perfumerías de España. Agora, o novo desafío foi o de fusionar estas franquicias nun só establecemento no centro de Ferrol, no emblemático local de cinco pisos situado xusto enfronte da casa consistorial.
Nos números 83-85 da rúa Real sitúase este xigante de 5 plantas dedicado á venta de produtos de perfumería, cosmética, maquillaxe, parafarmacia e coidado do fogar que a partir de hoxe xa está dispoñible para todo aquel que o precise.
Con esta nova incorporación a fai pouco inaugurada Praza de Armas está a coller algo de cor -e como non aroma- coa incorporación anterior da cafetería La Première, pero esta non será a última apertura, xa que a entidade bancaria CaixaBank anunciou o traslado das súas oficinas ao edificio que fai esquina entre a rúa Real e a da Terra, no antigo Hotel Ideal Room, prevista para o vindeiro luns 14 de setembro.
