O concelleiro de Urbanismo e Infraestruturas, Mobilidade, Vivenda e Rehabilitación, Julián Reina, mantivo esta mesma semana unha reunión con representantes veciñais do Ensanche A para escoitar as súas demandas máis urxentes ao tempo que atender as súas necesidades.
Incorporación do barrio no ITE
Durante o encontro, o edil e os veciños coincidiron na preocupación do necesario mantemento dos edificios do barrio, explicou Reina, polo que abordaron a posibilidade de incluír o Ensanche A no ámbito de actuación da Inspección Técnica de Edificios -ITE-, que actualmente intervén en Esteiro, A Magdalena e Ferrol Vello.
Tendo en conta a antigüidade dalgúns dos bloques do barrio, explica o edil, a concellería de Urbanismo está analizando a posibilidade de ampliar as intervencións da ITE a este barrio. De feito é un dos temas que onte mesmo se estudaron na reunión técnica que cada mércores celebra o seu departamento.
Traballos de roza nas inmediacións da pasarela de Santa Mariña
Reina tamén trasladou aos veciños do Ensanche A a recente finalización dos traballos de roza nas inmediacións da pasarela de Santa Mariña e a vontade da concellería de Urbanismo de impulsar os procedementos que seguen as licencias para instalar ascensores nos edificios.
Neste senso, o edil explicou que o Concello de Ferrol «manterá un contacto periódico coa asociación de veciños do Ensanche A con fin de establecer unha coordinación fluída e directa que nos permita avanzar neste asunto».
