A concelleira de Benestar Social, Eva Martínez, presidiu esta mañá unha nova reunión do Grupo de Traballo de Infancia, Familia e Adolescencia -integrado por Aspaneps, Ex-alcohólicos, Acción Familiar, Teima Down, Secretariado Gitano, Dignidad, Proinfancia, Asfedro e Ingada- na que se acordou manter un encontro co persoal técnico de Asfedro e Ex-alcohólicos para coordinar e pechar un programa de accións neste sentido.
Gran crecemento da ludopatía
Durante a reunión se analizaron os proxectos postos en marcha antes da pandemia co obxectivo de retomalos e adaptalos á nova situación. No tocante ás ludopatías, e tendo en conta que aumentaron como consecuencia do confinamento, «decidiuse dirixir os esforzos cara a prevencións das mesmas ampliando o traballo, como aconsellou Aspaneps, ao uso abusivo de xogos online, videoxogos e pornografía no móbil, ademais das apostas, que son a principal fonte de problemas na adolescencia”, afirmaba a edil.
Un estudo afectivo sexual nas aulas
En canto ao estudo afectivo sexual que estaba a desenvolver a entidade Acción Familiar e que quedou parado xusto cando se mandaran os cuestionarios aos centros educativos, Martínez Montero explicou que esta mañá se acordou retomalo e levar a cabo as enquisas e a análise dos datos no presente curso académico para logo desenvolver os obradoiros informativos ao longo do curso 2021-22.
A concellería de Benestar Social remitirá unha carta aos centros participantes para lembrar o proxecto e, así, poder continualo. Ademais, púxose enriba da mesa o impacto que está a ter a pandemia na infancia e adolescencia, polo que a concelleira, que amosou tamén a súa preocupación por este extremo, pediu ás entidades que presenten proxectos dirixidos a abordar dita problemática e, deste xeito, poder valorar o desenvolvemento dalgunha actividade sobre esta cuestión.
