A Deputación da Coruña e LALIGA abriron unha vía de colaboración para mellorar as instalacións deportivas municipais e reforzar a xestión dos clubs de fútbol base da provincia. O presidente da institución provincial, Valentín González Formoso, e o presidente de LALIGA, Javier Tebas, reuníronse na Coruña para analizar posibles proxectos conxuntos.
Entre as principais propostas figura a procura de solucións para facilitar aos concellos a renovación dos campos de fútbol de herba artificial, moitos deles próximos ao final da súa vida útil, así como a creación dunha escola de formación para mellorar a xestión económica e profesionalización das entidades deportivas.
Asesoramento para renovar os campos
A antigüidade de boa parte dos campos de herba artificial converteu a súa renovación nunha das actuacións máis demandadas polos concellos. Segundo explicou a Deputación, este tipo de obras supón actualmente un investimento medio de entre 260.000 e 300.000 euros por instalación, unha cantidade difícil de asumir para moitos municipios.
A institución provincial e LALIGA estudarán fórmulas de colaboración que permitan contar co asesoramento técnico da organización deportiva para definir solucións que reduzan os custos e faciliten as actuacións.
“Queremos buscar, coa experiencia e o coñecemento técnico de LALIGA, fórmulas que permitan facer estas actuacións nas mellores condicións posibles para os municipios”, sinalou Formoso.
A Deputación xa financia este tipo de intervencións mediante recursos propios, tanto a través do Plan Único (POS+) como mediante convenios cos concellos.
Unha escola para profesionalizar os clubs
A segunda gran liña de traballo pasa pola creación, coa colaboración de LALIGA, dunha escola de xestión económica e profesionalización destinada aos clubs de fútbol base da provincia.
A iniciativa dá continuidade aos cursos de formación organizados este ano pola Deputación a partir das necesidades trasladadas polas propias entidades deportivas. Nunha enquisa realizada pola institución participaron máis de 240 deportistas e representantes de clubs de 60 concellos e 40 modalidades deportivas.
Entre as principais demandas detectadas figuraron a formación en xestión económica, comunicación, captación de patrocinios e dixitalización.
O obxectivo agora é ampliar esa formación para abordar tamén cuestións como a planificación orzamentaria, a procura de novas fontes de financiamento, as obrigas administrativas e fiscais, o márketing ou a organización interna dos clubs.
4,3 millóns para o deporte provincial
A Deputación da Coruña destina este ano 4,3 millóns de euros en axudas directas ao tecido deportivo provincial. A intención da institución é complementar este apoio económico con ferramentas que permitan ás entidades mellorar a súa capacidade de xestión.
“LALIGA é unha referencia na xestión económica no fútbol e pensamos que a súa experiencia pode ser moi útil para unhas entidades que teñen que afrontar retos cada vez máis complexos”, apuntou Formoso.
Promoción da provincia a través do fútbol
O encontro tamén permitiu abordar outras posibles vías de colaboración relacionadas coa promoción da provincia da Coruña a través da proxección nacional e internacional do fútbol profesional.
Entre as posibilidades estudadas están iniciativas de apoio ao fútbol base, accións formativas, actividades vinculadas aos valores do deporte e a organización de eventos que poidan atraer visitantes e xerar actividade económica nos concellos.
Deputación e LALIGA acordaron manter aberto o diálogo para analizar a viabilidade destas propostas e concretar, posteriormente, posibles proxectos de colaboración.