A Deputación da Coruña impulsará durante todo o 2026 unha programación cultural e divulgativa arredor da figura de Begoña Caamaño co obxectivo de estender por toda a provincia o coñecemento da súa obra e do seu pensamento. A iniciativa, promovida pola Área de Lingua, busca sumarse á homenaxe que a Real Academia Galega dedica este ano á escritora e xornalista no marco do Día das Letras Galegas.
Begoña Caamaño, a gran protagonista do ano
A deputada de Lingua, Sol Agra, presentou as distintas actividades previstas e destacou a intención de que a celebración transcenda o propio 17 de maio, xa que a vontade da institución provincial é que a autora “sexa lida, cantada e celebrada durante todo o ano”, especialmente entre as novas xeracións.
O programa inclúe propostas culturais e educativas dirixidas a públicos diversos. Entre elas figura a distribución de libros sobre Begoña Caamaño en centros educativos e bibliotecas municipais, así como exemplares da súa novela Circe e o pracer do azul en institutos con Bacharelato. Ademais, organizaranse contacontos musicados, obradoiros literarios e actividades de escrita creativa na Biblioteca Provincial, en colaboración con entidades como a Asociación de Escritoras e Escritores en Lingua Galega.
A Praza da Quintana acollerá o Día das Letras Galegas
O acto principal terá lugar o 17 de maio na Praza da Quintana, en Santiago de Compostela. Baixo o título De Circes e Morganas, o espectáculo combinará poesía, música e creación audiovisual nun formato colectivo e participativo no que tomarán parte distintas artistas.
A música ocupará tamén un lugar relevante dentro da programación, promovendo a difusión do libro-disco Indómitas. Nove ondas a Begoña Caamaño, da cantante Uxía, e organizará varias actuacións da artista xunto á arpista bretoa Bleuenn Le Friec en diferentes concellos coruñeses.
A campaña contará ademais cunha identidade visual propia creada pola ilustradora Andreea Birsanu, coñecida artisticamente como Silvatiica. A imaxe inspírase no universo simbólico da autora e incorpora referencias ao feminismo, á sororidade e ao activismo social que marcaron a súa traxectoria persoal e literaria.
Desde a Área de Lingua subliñan que a programación pretende reivindicar non só a dimensión literaria de Begoña Caamaño, senón tamén o seu papel como voz crítica e comprometida coa transformación social e cultural de Galicia.
