A cidade da Coruña volverá a converterse no epicentro do audiovisual galego ca celebración da XXV edición dos Premios Mestre Mateo. A Academia Galega do Audiovisual anunciou que a gala terá lugar o próximo 27 de febreiro en Palexco, nunha edición especialmente significativa ao coincidir co 25 aniversario duns galardóns que se consolidaron como a principal cita de recoñecemento ao sector audiovisual de Galicia.
Unha edición marcada por novas categorías e cambios nas súas bases
A XXV edición dos premios chega marcada por unha actualización das súas bases, con cambios destinados a adaptar os galardóns á evolución do sector audiovisual galego. Entre as principais novidades destacan a creación de novas categorías para diferenciar formatos e ámbitos de produción, como as de longametraxe e serie en lingua non galega, así como novas distincións para programas informativos, divulgativo, de actualidade e entretemento.
Ademais, reorganízanse os premios á dirección e á comunicación segundo o tipo de obra, introdúcese unha regulación específica sobre o uso de intelixencia artificial xenerativa nas candidaturas e modifícanse os criterios de inscrición para reforzar o recoñecemento do talento e a participación galega nas producións.
Palexco volverá a vestir de gala para os Premios Mestre Mateo
O anuncio realizouse este martes nunha rolda de prensa celebrada no Concello da Coruña, ca participación da presidenta da Academia Galega do Audiovisual, Lucía Veiga, e a alcaldesa da cidade, Inés Rey. A celebración supón a volta dos premios na cidade que acolleu un total de catorce edicións. A primeira tivo lugar en 2006, precisamente en Palexco, escenario que volverá a recibir a cita do audiovisual galego anos despois da súa última celebración na cidade.
Dende a Academia destacan que esta edición terá un significado especialmente simbólico a conmemorar os 25 anos de historia duns premios que acompañaron a evolución e consolidación do sector audiovisual galego. Ademais da gala, A Coruña será escenario durante as próximas semanas de diversas actividades dirixidas a achegar ao audiovisual galego á cidadanía. A presentación oficial da XXV edición celebrarase o próximo 18 de novembro, data na que se darán a coñecer as candidaturas e as primeras actividades desta programación especial.