A Deputación da Coruña, a Xunta de Galicia e os concellos de Cee e Corcubión asinaron o convenio que permitirá construír a nova estación depuradora de augas residuais (EDAR) que dará servizo a ambos os municipios. A actuación contará cun investimento de preto de 14 millóns de euros e busca modernizar o sistema de saneamento da ría de Corcubión, substituíndo unha instalación que leva décadas en funcionamento e que xa non responde ás necesidades actuais.
Do investimento total, 1,4 millóns de euros serán achegados pola Deputación para reducir o esforzo económico que deberán asumir os dous concellos. O resto do financiamento correrá a cargo dos fondos europeos FEDER, Augas de Galicia e das administracións locais.
Reparto do financiamento
O proxecto ten un orzamento de 13,87 millóns de euros. Os fondos FEDER financiarán o 60 % da actuación, mentres que Augas de Galicia asumirá outro 20 %. O 20 % restante será achegado polas administracións locais.
Neste reparto, a Deputación contribuirá con 1,4 millóns de euros, dos que un millón irá destinado ao Concello de Ceee 400.000 euros ao de Corcubión. Pola súa banda, Cee achegará algo máis de un millón de euros, mentres que Corcubión asumirá arredor de 343.500 euros.
Unha infraestrutura para máis de 16.400 habitantes
A nova depuradora construirase no municipio de Cee, nas proximidades da actual EDAR, o que permitirá manter o servizo mentres se executan as obras.
A instalación estará preparada para atender a máis de 16.400 habitantes equivalentes e contará cun sistema de tratamento adaptado ás esixencias ambientais actuais, con procesos de depuración biolóxica, eliminación de nitróxeno, desinfección mediante raios ultravioleta e tratamento de lodos, entre outras prestacións.
Mellorar a calidade ambiental da ría
A actuación ten como principal obxectivo reforzar o saneamento da ría de Corcubión e mellorar a calidade das súas augas, unha contorna de especial valor ambiental e económico para a comarca.
Durante a sinatura do convenio, o presidente da Deputación, Valentín González Formoso, destacou que se trata dunha infraestrutura que dificilmente poderían asumir en solitario concellos do tamaño de Cee e Corcubión e defendeu a colaboración entre administracións como clave para sacar adiante proxectos deste alcance. Pola súa banda, a conselleira de Medio Ambiente, Ángeles Vázquez, e os alcaldes dos dous municipios coincidiron en sinalar a importancia do acordo para resolver unha demanda histórica e modernizar o sistema de depuración da ría.
