O dolmen de Cabaleiros, en Tordoia, será escenario de catro visitas guiadas destinadas a achegar á cidadanía tanto o propio monumento como os traballos de investigación arqueolóxica que se están desenvolvendo actualmente no seu contorno. A iniciativa está promovida pola Deputación da Coruña, propietaria do ben, e permitirá coñecer de primeira man os avances dun proxecto de investigación desenvolvido pola Universidade e financiado con fondos europeos.
As visitas estarán comentadas polo arqueólogo Ángel Concheiro Coello, integrante do equipo que participa nos traballos, e combinarán a explicación sobre a historia e as características do dolmen coa información sobre as actuacións arqueolóxicas que se están levando a cabo.
Catro visitas entre setembro e outubro
A programación inclúe catro quendas, todas elas con inscrición previa:
- Venres 25 de setembro, ás 19:00 horas
- Sábado 26 de setembro, ás 11:00 horas
- Venres 2 de outubro, ás 19:00 horas
- Sábado 3 de outubro, ás 11:00 horas
Durante os percorridos, Concheiro Coello explicará sobre o propio terreo diferentes aspectos relacionados co monumento e coa investigación en curso, así como os coñecementos que estes traballos poden achegar para comprender mellor a historia do dolmen e da súa contorna.
As persoas interesadas en participar deberán formalizar a inscrición no Concello de Tordoia, ben a través do teléfono 981 69 00 01 ou do correo electrónico [email protected].
Investigación para coñecer mellor o monumento
O deputado provincial de Patrimonio e Contratación, Xosé Penas, visitou esta semana o dolmen acompañado por persoal técnico da Deputación e polo alcalde de Tordoia. Durante a visita destacou o traballo que a institución provincial está a desenvolver arredor do monumento, tanto no ámbito da recuperación, conservación e mantemento como no da súa divulgación.
Penas salientou tamén a importancia de que a cidadanía poida coñecer non só o propio patrimonio, senón os resultados e procesos da investigación científica que se está desenvolvendo actualmente.
O proxecto arqueolóxico en marcha permitirá avanzar no coñecemento do dolmen e da súa contorna e está previsto que nos próximos meses achegue novos datos sobre o monumento.
Novas actuacións previstas
A Deputación da Coruña ten previsto encargar nos vindeiros meses un novo proxecto destinado a continuar avanzando no coñecemento arqueolóxico do dolmen e, ao mesmo tempo, introducir melloras na súa contorna.
A intención é dar continuidade ao traballo que se está desenvolvendo actualmente, combinando a investigación coas actuacións de conservación e coa divulgación do patrimonio.
O dolmen de Cabaleiros constitúe así un dos bens megalíticos nos que a Deputación está a concentrar esforzos para ampliar o coñecemento sobre o patrimonio arqueolóxico e facilitar o seu acceso á sociedade.
A Casa da Moura de Tordoia
Situado na parroquia de Cabaleiros, o dolmen é un dos monumentos megalíticos máis destacados da comarca de Ordes e da provincia da Coruña. É propiedade da Deputación Provincial e foi declarado Monumento Histórico-Artístico en 1975.
O monumento é coñecido popularmente como Casa da Moura e está estreitamente ligado á tradición oral da zona. Entre as lendas asociadas ao dolmen figura a dunha moura que, segundo a tradición, levou a laxa de cuberta sobre a cabeza mentres tecía coas mans.
Na actualidade conserva seis das laxas dunha cámara poligonal, que permiten apreciar a relevancia do conxunto dentro do patrimonio megalítico da provincia.
As catro visitas guiadas permitirán, polo tanto, achegarse a este elemento patrimonial desde unha dobre perspectiva: a do propio monumento e a dos novos coñecementos que está a xerar a investigación arqueolóxica actualmente en marcha.