O Concello de Brión celebrou este luns a decisión do Consello da Xunta de declarar a Romaría de Santa Minia como Festa de Interese Turístico de Galicia, un recoñecemento que o goberno local cualifica de “xusto e necesario” para unha das celebracións máis multitudinarias e arraigadas da comarca.
O alcalde, Pablo Lago, destacou que se trata dun obxectivo no que o executivo municipal levaba traballando desde hai tempo, tanto na elaboración da documentación técnica como na recopilación de apoios veciñais. Neste sentido, puxo en valor a implicación da cidadanía, que en poucos días reuniu máis de 1.200 sinaturas en apoio á candidatura.
“Esta declaración supón un paso importante na promoción da Romaría de Santa Minia e contribuirá a reforzar a súa proxección nos vindeiros anos, pero sobre todo é un acto de xustiza cunha celebración que forma parte da identidade de Brión”, sinalou o rexedor.
Unha festa con gran impacto e miles de visitantes
A Romaría de Santa Minia celébrase cada 27 de setembro e reúne habitualmente entre 30.000 e 50.000 persoas, combinando os actos relixiosos tradicionais con programación musical, actividades culturais e propostas gastronómicas.
Segundo destaca a Xunta de Galicia, trátase dunha celebración que foi medrando co paso do tempo ata converterse nun dos grandes puntos de encontro da comarca do Sar, cun forte compoñente social e festivo que se mantén desde o século XIX.
Un expediente reforzado con apoio veciñal e informes técnicos
Durante o proceso de tramitación, iniciado en 2024, a Xunta considerara inicialmente que non quedaban suficientemente acreditados aspectos como o arraigo ou a singularidade da festa. O Concello completou entón a memoria presentada con documentación adicional, informes históricos e material gráfico e audiovisual.
Entre esa documentación inclúese un estudo do historiador Clodio González, integrante da Real Academia Galega, así como un informe do párroco de Brión, que destaca a orixe popular da devoción, nacida “no sentir común dun grupo de fieis laicos brioneses” no século XIX.
A estes documentos sumáronse tamén as máis de 1.200 sinaturas recollidas entre a veciñanza en apoio á candidatura, que o goberno local considera clave para reforzar a dimensión social e participativa da romaría.
Desde o Concello confían en que esta nova distinción contribúa a incrementar a proxección turística da celebración e a consolidar Brión como un referente dentro das festas tradicionais galegas. O goberno municipal agradeceu tamén o traballo do persoal técnico implicado na elaboración do expediente e o apoio institucional recibido durante o proceso de avaliación.
