O Concello de Brión fai un chamamento á responsabilidade e á colaboración da veciñanza ante o incremento significativo do consumo de auga rexistrado nos últimos días, nun contexto marcado tamén pola situación de seca e polas previsións de altas temperaturas.
O goberno local lembra que a auga é un recurso esencial, limitado e de uso común, polo que considera necesario reducir o consumo, especialmente daqueles usos que non son imprescindibles. As medidas adoptadas permanecerán vixentes ata novo aviso co obxectivo de preservar as reservas e asegurar o abastecemento no municipio.
Que usos se deben evitar?
O Concello pide á cidadanía que suspenda temporalmente determinados consumos de auga potable, especialmente aqueles relacionados co mantemento de espazos exteriores.
Entre as recomendacións figuran:
- Evitar o rego de xardíns, hortas, céspedes e outras zonas verdes.
- Non encher piscinas.
- Evitar o lavado de vehículos.
- Non empregar auga da rede para a limpeza de beirarrúas, patios, fachadas e outros espazos exteriores.
- Reducir calquera outro uso non esencial que poida supoñer un consumo elevado.
O Concello fai especial fincapé na importancia de aplicar estas medidas durante os días de calor, cando a demanda de auga tende a incrementarse.
Seguimento diario da situación
Desde o Concello sinalan que se mantén un contacto continuo con Espina & Delfín, empresa concesionaria do servizo no municipio, para realizar un seguimento da situación e da evolución do consumo.
O obxectivo é garantir que toda a veciñanza dispoña de auga potable e evitar que a situación obrigue a adoptar medidas de maior alcance.
Neste sentido, o Concello advirte de que, se non se consegue reducir o consumo, podería verse na necesidade de aplicar restricións máis severas para asegurar o abastecemento.
A petición chega ademais nun contexto de seca xa advertido por Augas de Galicia, polo que o Concello considera fundamental a implicación de toda a cidadanía para facer fronte a esta situación.