Outro ano máis, os nenos e nenas de Oroso volven a contar cunha ampla oferta de actividades dentro da programación no Nadal 2021. Son datas moi especiais para toda a veciñanza, pero especialmente para os máis pequenos e as súas familias, que son o público obxectivo de gran parte das actividades.
Os obradoiros de manualidades, as sesións de maxia e os espectáculos teatrais son algunhas das propostas organizadas para que as familias podan gozar nun entorno seguro e baixo o cumprimento dos protocolos sanitarios.
O 18 de decembro arranca a intensa axenda cun obradoiro de bonecos de neve para nenos maiores de 5 anos e o espectáculo “Derriba da lúa”. Unha obra de narración oral e musical dirixida a familias con bebés de 0 a 3 anos. O teatro volverá o 29 de decembro para o público familiar coa función “As bombas e o xeneral” da compañía Tanxarina e a maxia inundará o centro cultural o 30 do mesmo mes co espectáculo “El mágico viaje de Patri Zenner”.
Pola súa parte, o 3 e 4 de xaneiro os obradoiros de gofres e vasiños de chocolate serán unha alternativa para a rapazada con máis dotes culinarias. Tamén haberá un tren safari infantil instalado ata o 5 de xaneiro e un concurso de postais de Nadal con mensaxe.
Ademais, os nenos e nenas de máis de 8 anos poderán inscribirse para participar na excursión do 28 de decembro ao Nova Jump – Trampoline Park de Santiago de Compostela.
Pero non todas as citas do calendario están dirixidas á poboación infantil. Os adultos tamén contarán con actividades específicas, como o obradoiro de centros de Nadal con froita programado para o 22 de decembro e os concertos organizados pola Escola Municipal de Música para o día 23. Ambos días tamén serán perfectos para mercar algún agasallo no Mercado de Artesanía formado por vendedores locais.
Dentro da axenda, cabe sinalar as tres visitas especiais que acollerá o municipio durante estas datas. Papa Noel será o primeiro en atender ás peticións das crianzas o 23 en horario de mañá e de tarde na praza de Isaac Díaz Pardo. Despois será a quenda do Apalpador, que percorrerá as rúas da localidade partindo ás 19.00 horas desde a praza de Alexandre Bóveda ata a Isaac Díaz. Por último, os Reis Magos despedirán as festas de Nadal o 5 de xaneiro cunha recepción no pavillón municipal e a Gran Cabalgata.
Discussion about this post