Camiño Escena Norte volverá encher de artes escénicas diferentes escenarios de Galicia durante o outono cunha programación que chegará a nove municipios das provincias da Coruña e Lugo. O programa de intercambio cultural desenvolverase entre o 18 de setembro e o 15 de novembro e permitirá ao público galego descubrir propostas procedentes de Asturias, Cantabria, Euskadi, Navarra e A Rioxa.
Baixo o lema ‘Latexos Escénicos’, esta nova edición aposta por achegar ao público diferentes linguaxes e formatos, desde o teatro para adultos e familiar ata os monicreques, o ilusionismo inmersivo e outras propostas vinculadas ás artes vivas.
Nove concellos acollerán o Itinerario Constelacións
As representacións do denominado Itinerario Constelacións recalarán en Foz, Sarria, Outes, Negreira, Lugo, Santiago de Compostela, Ribadeo, Arzúa e Vimianzo.
A programación comezará o 26 de setembro en Foz e continuará ao día seguinte en Sarria coa obra Juana I de Castilla, de Nueve Lunas Teatro, unha proposta que combina humor, música e ironía para abordar cuestións como a violencia contra as mulleres e a saúde mental.
O 10 de outubro, Outes recibirá 52 Hercios, de Ados Teatroa, unha peza que emprega como punto de partida o canto dunha balea que se comunica nunha frecuencia diferente á do resto da súa especie para reflexionar sobre a soidade non desexada.
O teatro familiar chegará a Negreira o 16 de outubro e a Arzúa o 30 de outubro con El gato con botas de agua, unha reinterpretación contemporánea do coñecido conto infantil a cargo da compañía asturiana El Callejón del Gato.
Por outra banda, Lugo e Santiago de Compostela acollerán os días 17 e 18 de outubro, respectivamente, La balada del norte, adaptación teatral da novela gráfica de Alfonso Zapico realizada por Saltantes Teatro. A obra afonda na memoria histórica e no conflito de clases a través do contexto da Revolución de 1934.
En Ribadeo, o 25 de outubro, Hodei presentará 3 Elementos – Una experiencia mágica inmersiva 360º, un espectáculo de ilusionismo multisensorial pensado para todos os públicos, con dúas funcións programadas.
A programación galega de Camiño Escena Norte rematará o 30 de outubro en Vimianzo con ¿Dónde están los niños?, de Tartean Teatroa, unha obra que reflexiona sobre as presións ás que se enfronta a infancia e sobre as consecuencias dunha sociedade cada vez máis esixente.
Tres compañías galegas levarán o seu traballo ao norte da Península
O intercambio cultural será tamén de ida e volta. Mentres Galicia recibe espectáculos doutras comunidades, tres compañías galegas percorrerán Asturias, Cantabria, Euskadi e Navarra para mostrar a creación escénica producida en Galicia.
Ártika Cía participará co espectáculo Non pasarán, Teatro de Ningures levará As gardiás, ou o nó do tecelán, distinguido co Premio da Crítica de Galicia 2025, e Teatro O Cubo presentará Voo.
As propostas galegas terán presenza en localidades como Marina de Cudeyo, Hondarribia, Corvera, Zizur Mayor, Unquera, Villaviciosa, Zarautz, Xixón e Sopela, ampliando así a circulación das producións do país.
Camiño Escena Norte está impulsado polas asociacións profesionais Escena Galega, EscenAsturias, ACEPAE, Escena, ESNA e AEscena, representantes dos seis territorios participantes. Desde a súa creación, o programa busca favorecer a mobilidade das compañías e o intercambio cultural mediante propostas de teatro, danza, monicreques, circo contemporáneo, ilusionismo e artes do movemento.
A iniciativa conta co apoio de diferentes administracións públicas e entidades, entre elas a Xunta de Galicia, a través da Axencia Galega das Industrias Culturais (Agadic), e a Deputación de Lugo, ademais dos gobernos autonómicos e institucións dos territorios participantes. Vegalsa-Eroski mantense como patrocinador oficial.
Toda a programación pode consultarse na web de Camiño Escena Norte, que tamén ofrece o Catálogo de Espectáculos Recomendados, composto por 36 propostas, 18 delas integradas no Itinerario Constelacións.