A conta Compostela Resiste vén de sinalar novos actos incívicos de visitantes e peregrinos na cidade: desta vez, sobre o Colexio de Fonseca, un dos edificios históricos que conforman o casco antigo da cidade, declarada Patrimonio da Humanidade dende 1985.
Na imaxe vese a un grupo de turistas vestidos con camisas de flores escalando sobre a construción, que data do 1688.
A publicación despertou reaccións negativas nas redes sociais, con comentarios que denuncian a inacción das autoridades e sinalan a normalización destas prácticas na cidade: «Desfase absoluto! Que esperan as autoridades?» ou «A pena era non poder deixalo pendurando polos c****ns dende o alto da Berenguela».
Ademais, dende Apatrigal, apuntan que «Escalar monumentos, deixar cadeados ou gravar nomes non son anécdotas: son mostras dunha preocupante falta de respecto» e sinalan que a cidade «non necesita máis visitantes, senón visitantes máis conscientes e responsables«.
