Un grupo de mozos e mozas agrupados arredor do colectivo A Miñoca ocupou unha antiga nave industrial situada na rúa García Blanco, no barrio compostelán de Sar, coa intención de transformala «nun centro social autoxestionado e aberto á veciñanza». O inmoble, situado xunto á libraría-cinema Numax e a Sala Capitol e fronte ao colexio da Inmaculada, levaba máis de quince anos sen uso.
A través dun comunicado, o colectivo preséntase como un “Centro Social Okupado Autoxestionado Anarquista (CSOA)” creado “co único propósito de facer barrio”. Os integrantes aseguran que a okupación busca recuperar un espazo abandonado nun contexto no que, denuncian, Compostela perde veciñanza e comercio tradicional mentres aumentan os pisos turísticos.
«Sabemos que a palabra ‘okupa’ pode xerar desconfianza e entendemos que haxa preguntas, por iso
queremos presentarnos como é debido», aseguraba o colectivo nun comunicado no que avanzaban que terán actividades para todas as idades, «onde as crianzas, as nais e as avoas poidan coincidir e aprender unhas das outras». «Porque iso tamén é resistencia: recuperar o tempo e o espazo para vivir xuntas», conclúen.
“Un lugar onde reunirse sen consumir”
“Somos xente do barrio e da cidade que bota en falta lugares onde reunirse sen consumir nin pedir permiso”, sinalan desde A Miñoca. Ademais, reivindican a herdanza doutros proxectos comunitarios que existiron en Sar, como a Casa do Peixe ou a Casa Encantada, aos que atribúen un papel importante na creación de tecido social e comunitario.
Segundo explican, escolleron esta nave porque consideran que simboliza a transformación urbanística e social da cidade. O colectivo sostén que o propietario proxecta derrubar o edificio para construír apartamentos turísticos, unha idea que rexeitan frontalmente. “Máis cemento e menos barrio”, resumen.
Obradoiros, teatro e actividades gratuítas
A Miñoca pretende converter o espazo nun punto de encontro veciñal con actividades gratuítas e abertas a todas as idades. Entre as propostas que avanzan figuran obradoiros de carpintería, electricidade ou fontanería, ademais de teatro, baile, coro, bordado, coidado de plantas e actividades deportivas.
O obxectivo, indican, é que crianzas, persoas adultas e maiores poidan compartir coñecementos e tempo nun espazo común. “Recuperar o tempo e o espazo para vivir xuntas tamén é unha forma de resistencia”, defenden.
O colectivo aposta ademais por un modelo de funcionamento baseado na autoxestión e na organización horizontal, sen subvencións nin intermediarios institucionais. Aínda que recoñecen que o inmoble ten propietario, xustifican a ocupación argumentando que o edificio permaneceu abandonado durante anos e que o seu proxecto pretende “dar vida” a un espazo sen uso.
Chamamento á colaboración veciñal
Mentres avanzan nas tarefas de acondicionamento, os ocupantes iniciaron unha campaña para solicitar colaboración cidadá. Para este xoves convocaron unha xornada aberta de traballo a partir das 17:00 horas, na que piden achegas de mobiliario, cadeiras, mesas, estanterías, material de limpeza e elementos de decoración para habilitar a nave.
A apertura deste novo espazo lembra a outras experiencias similares na capital galega: ademais da Casa do Peixe ou a Casa Encantada, os referentes que indican desde A Miñoca, o máis coñecido nos últimos anos foi o CSOA Escarnio e Malidzer, na Algalia de Arriba, cuxo desaloxo policial en 2017 rematou con disturbios e varios detidos. Tras recuperar a súa actividade, este espazo foi desaloxado de novo en xaneiro deste mesmo ano.
