Dende o 4 ata o 22 de agosto a capital galega vivirá 30 propostas artísticas de diferentes estilos musicais polas rúas e prazas da súa zona vella. Este ano incorporarán ademais a proxección e coloquio do documental «A Terra por gañar. Unha historia do ecoloxismo galego» de ADEGA.
Organizado pola Asociación Cultural Cidade Vella co apoio do Concello de Santiago e o patrocinio da Deputación da Coruña, trátase dun festival que, como destacou a concelleira de Capital Cultural, Míriam Louzao, «é un espectáculo de escala humana que nos recorda a grandeza do pequeno».
Doutra banda, a directora do festival Ánxeles Porto puxo en valor, durante a rolda de prensa no Pazo de Raxoi, o cartel do festival, feito pola música e ilustradora Gloria Pavía, que rende homenaxe ao artista Narf no décimo aniversario do seu falecemento. Asi mesmo, destacou a variedade de estilos musicais do proxecto que permitirá o desfrute dun público moi variado, indo dende o art rock británico de Chop Chop, ata os sons brasileiros de Mirla Riomar ou o jazz galego e estadounidense do Alma Micic Trío.
Na presentación tamén estaba o presidente da Asociación Cultural Cidade Vella, Jesús Pais, quen destacou a importancia que logrou este festival na dinamización cultural da zona vella.
Unha programación que une Galicia co resto do mundo
Durante o mes de agosto, os veciños non só desfrutarán de recoñecidas propostas galegas senón tamén doutras tantas internacionais. No ámbito galego actuarán Ruxe-Ruxe, Allo Negro, Seixo, Muaré, Mother Pearl & The Rockin’ Rebels, Océano Eskizo, ou Saibran. Doutra banda, chegarán artistas de fóra como Yosvany Terry de Cuba, Alma Micic Trío (entre Galicia e Estados Unidos), Mirla Riomar (Brasil) e Marcel Vallès (Cataluña) ou Chop Chop dende Reino Unido.
Isto permite a Feito a Man posicionarse como un festival que transita tanto por diversos estilos musicais como polo talento galego e internacional. A programación aposta tamén polas artes escénicas con espectáculos de improvisación teatral e musical así como a proxección do documental de ADEGA para reflexionar acerca do medioambiente. A programación completa pode consultarse na web do festival.
Todo isto levarase a cabo en 14 espazos diferentes, entre os que están a Praza de Feixóo, a Rúa de Xelmírez, a Praza da Quintana ou San Paio de Antealtares.