Do 4 ao 19 de setembro, o Morrazo volverá acoller unha nova edición do Festival Internacional de Cinema de Bueu (FICBUEU). Durante dúas semanas, o festival ofrecerá unha extensa programación cultural para todos os públicos, repartida por diferentes espazos do municipio e coa curtametraxe como principal protagonista.
Esta 19ª edición reafirma o peso do FICBUEU no circuíto internacional de festivais, especialmente tras a súa incorporación á listaxe de festivais calificadores para os Premios Goya. Neste contexto, a dirección do certame afronta a nova edición con especial expectación e compromiso e asegura ter “a sensación de estar diante dunha das mellores Seccións Oficiais da historia do festival”.
Os exteriores do Centro Social do Mar, o seu Auditorio e Sala Multiusos, e a Sala Amalia Domínguez Búa serán algúns dos principais escenarios nos que se desenvolverán as diferentes actividades, encontros e proxeccións que conforman o programa desta edición.
No apartado competitivo, o festival contará coa Sección Oficial e con diferentes seccións paralelas, entre as que se atopan GZ_00, dedicada ao cinema galego; as Escolas de Cinema Internacionais; as Escolas de Cinema Galegas e Descubertas. A programación incluirá tamén unha Sesión Retrospectiva de Ciencia Ficción, baixo o título ‘Anticipar o presente: un século de curtas de ciencia ficción’, que realizará un percorrido polo xénero a través do formato curto.
O certame repartirá numerosos recoñecementos, entre eles o Primeiro Premio, Premio do Público, Mellor Curtametraxe Galega, Mellor Curtametraxe Española, Premio Descubertas e Premio GZ_00, ademais dos galardóns ás mellores curtametraxes das Escolas de Cinema Internacionais e das Facultades e Escolas de Cinema Galegas. O xurado oficial estará integrado por Magdalena Arau, Masoud Soheili e Miguel Dias, encargados de valorar as obras da Sección Oficial.
A programación completarase coas xornadas de encontro ‘Os límites do cinema’, unha proposta que busca explorar os límites éticos, culturais, estéticos e industriais do cinema. A través de mesas redondas, clases maxistrais e unha proxección, o festival convidará a reflexionar sobre o que vemos na pantalla, pero tamén sobre como e por que se constrúen esas representacións. Entre os participantes estarán Jara Yáñez e Antonio José Navarro.
O público máis novo terá tamén o seu propio espazo dentro do festival co MiniFic, que do 14 ao 19 de setembro ofrecerá sesións para escolares, obradoiros, concertos e proxeccións pensadas para achegar o cinema ás novas xeracións. A proposta estará acompañada pola Ludoteca FICBUEU, un servizo gratuíto de conciliación familiar para rapazada de entre 3 e 12 anos.
Tamén o proxecto editorial Cadernos FICBUEU, «que afonda nas obras presentadas e no contexto que as enmarca, contribuíndo á reflexión e á historiografía da curtametraxe», sumará unha nova entrega nesta edición co Caderno FICBUEU #7, que estará dispoñible en físico durante a celebración do festival e todo o ano na súa tenda online.
Venres 4: xornada de apertura
- 20:00 h — 🎬 Concerto. Chus Pazos Ensemble 📍 Exteriores do Centro Social do Mar
- 21:00 h — 🎬 Apertura do festival e proxección de La Jetée, de Chris Marker 📍 Auditorio
Sábado 5: xornadas cinematográficas
- 10:30 h — 🎬 Mesa redonda: Límites da representación no cinema contemporáneo 📍 Sala Multiusos
- 12:30 h — 🎬 Clase maxistral: Autocensura e cancelación 📍 Sala Multiusos
- 16:30 h — 🎬 Clase maxistral: Fronteiras difusas: a industria e as súas marxes 📍 Sala Multiusos
- 18:30 h — 🎬 Mesa redonda: Colonización e resistencia no cinema contemporáne 📍 Sala Multiusos
- 20:30 h — 🎬 Proxección de Les Rendez-vous d’Anna, de Chantal Akerman 📍 Auditorio
Domingo 6: certame de curtametraxe
- 11:00 h — 🎬 Presentación do Caderno FICBUEU #7 📍 Sala Amalia Domínguez Búa
- 12:30 h — 🎬 Sección Retrospectiva: Ciencia Ficción 📍 Auditorio
- 18:00 h — 🎬 Sección Descubertas 📍 Auditorio
- 20:00 h — 🎬 Sección GZ_00 📍 Auditorio
- 21:30 h — 🎬 Coloquio Sección GZ_00 📍 Sala Amalia Domínguez Búa
Dende luns 7 ao Xoves 10: certame de curtametraxes
- 19:00 h — 🎬 Sección Oficial 1/2/3/4 📍 Auditorio
- 20:30 h — 🎬 Coloquio coa Sección Oficial 1/2/3/4 📍 Sala Amalia Domínguez Búa
- 21:30 h — 🎬 Sección Oficial 1/2/3/4 📍 Auditorio
Ademais, o venres 11: Certame de curtametraxes e seccións paralelas
- 17:00 h — 🎬 Sección Escolas Internacionais 📍 Auditorio
- 19:00 h — 🎬 Sección Oficial 5 📍 Auditorio
- 20:30 h — 🎬 Coloquio Sección Oficial 5 📍 Sala Amalia Domínguez Búa
- 21:30 h — 🎬 Sección Oficial 5 📍 Auditorio
O sábado 12: fin da certame e palmarés
- 17:00 h — 🎬 Sección Escolas Galegas 📍 Auditorio
- 19:00 h — 🎬 Sección Oficial 6 📍 Auditorio
- 20:30 h — 🎬 Coloquio Sección Oficial 6 📍 Sala Amalia Domínguez Búa
- 21:30 h — 🎬 Sección Oficial 6 📍 Auditorio
- 23:00 h — 🏆 Entrega de premios 📍 Sala Multiusos
O domingo 13: proxección
- 18:30 h — 🎬 Proxección do Palmarés FICBUEU 2026 📍 Auditorio
Dende o luns 14 ao sábado 19: MINIFIC
- 🎬 Proxeccións para escolares
- 🎬 Gala Escolas Galegas
- 🎨 Obradoiro de cartelería
- 🎵 Concerto de Pakolas
- 🎬 Sección Curtas en Familia
A programación inclúe, ademais, unha actividade previa á inauguración oficial: ‘Cinema na praia’, que o venres 28 de agosto levará á praia de Bueu, na zona de Banda do Río, unha escolma de curtametraxes doutras edicións do festival.