O alcalde de Pontedeume, Bernardo Fernández, mantivo unha reunión coa nova presidenta de Portos de Galicia, Susana Lenguas, na que lle trasladou “a necesidade de acometer a curto prazo o dragado da ría”.
Fernández, que acudiu en compañía do patrón maior da Confraría de Pescadores, Santiago Salgado, e dos presidentes do Club Náutico Firrete e do Club Entrepontes, Ramiro Piñeiro e Javier Garcia, cualificou de “cordial e frutífera” a reunión, na que se trataron varios temas polas infraestruturas e competencias que ten o organismo en Pontedeume.
“O dragado da ría urxe, temos xa problemas de calado nas zonas dos pantaláns das embarcaciones profesionais e das deportivas”, afirma o alcalde de Pontedeume.
“Trátase ademais dunha actuación previa a solicitar a ampliación dos puntos de amarre, xa que hai unha lista de espera de 170 embarcacións só para a zona deportiva”, lembra.
No encontro falouse tamén das próximas obras de rehabilitación e mellora dos pantaláns, uns traballos que están na fase de supervisión previa á licitación. En opinión de Bernardo Fernández, “foi unha primeira toma de contacto moi positiva e quedamos en manter pronto novos encontros”.
Relacionado: Novo saneamento para a fachada marítima eumesa
