A CIG-Servizos vén de denunciar a situación “de abandono” na que se atopa o persoal das residencias privadas da terceira idade na comarca de Ferrolterra. Segundo o sindicato, “a Xunta está a facer oídos xordos ante as demandas que se lle están a formular e que afectan tanto ao persoal como aos usuarios usuarias dos centros, xa que están expostos a un grave risco polo contaxio do COVID-19 dende o comezo da emerxencia sanitaria”.
A responsable do sector das residencias privadas da terceira idade na CIG de Ferrol denuncia que a falla de test para facer as probas ás traballadoras e aos traballadores que estiveron en contacto co coronavirus, “fai que esas persoas teñan que seguir traballando, co conseguinte risco para a saúde, tanto do persoal coma das persoas residentes”.
Una situación que provoca ademais que “o persoal destes centros estea a sufrir unha exposición innecesaria ao propio risco biolóxico pero tamén, unha situación de estrés emocional e ansiedade ao verse expostos a un risco grave e descoñecido ante o que se senten totalmente vulnerábeis”.
Discussion about this post