O Concello de Cedeira vén de instalar un novo panel informativo xunto aos restos da antiga fábrica de salgadura recentemente escavados e postos ao descuberto ao pé da praia da Madalena, á altura da praza da Constitución.
A actuación busca facilitar a interpretación deste espazo e achegar á veciñanza e ás persoas visitantes unha parte da historia económica e social de Cedeira, marcada durante décadas pola relación da vila co mar e coa actividade vinculada á conservación do peixe.
Unha actividade fundamental para a vila
A nova sinalización explica a importancia que tiveron as fábricas de salgadura no desenvolvemento de Cedeira e na configuración da súa identidade mariñeira. A información recollida no panel lembra que na praia da Madalena chegaron a existir ata sete fábricas de salgadura, o que dá unha idea do peso que esta actividade chegou a ter na localidade.
O panel incorpora tamén unha recreación do interior dunha destas instalacións, permitindo coñecer como funcionaba o proceso de salgadura e o papel que desempeñaban as pías nas que se depositaban o peixe e o sal.
Patrimonio ligado ao mar
A instalación desta sinalización forma parte dos traballos municipais para poñer en valor e divulgar o patrimonio histórico e industrial de Cedeira, facilitando que estes elementos poidan ser comprendidos tamén por quen visita a vila.
Os restos da antiga fábrica pasan así a contar cun recurso que permite contextualizar o que queda da estrutura e entender a súa relación coa actividade económica que durante anos marcou a vida da localidade.
A iniciativa contribúe, ademais, a recuperar e transmitir un legado directamente ligado á identidade cedeiresa e á estreita relación da vila co mar, mantendo viva a memoria dunha actividade que axudou a definir o carácter mariñeiro de Cedeira.