A Garda Civil do Posto de Fene detivo a unha persoa, como presunto autor dun delito de estafa. Os feitos ocorreron por mor da denuncia interposta polo xerente dunha empresa, comunicando que autor ou autores descoñecidos estaban a facer un uso fraudulento dunha tarxeta de combustible asociada a un camión da súa frota.
A Garda Civil investigou os feitos para constatar a veracidade dos mesmos e no seu caso esclarecer os posibles delitos e identificar o autor ou autores dos mesmos. No transcurso da investigación os axentes comprobaron a existencia dos cargos na tarxeta que proviñan da realización de repostaxes en varias estacións de servizo das localidades de Miño e Neda, por un importe total de 13.000 euros e do pago de peaxes de autoestradas por valor de 534 euros, alcanzando a contía total de 13.534 euros.
A Garda Civil realizou unha análise pormenorizada da información solicitada durante a investigación, logrando a identificación plena do autor do delito, resultando ser un antigo traballador da empresa, o cal aproveitou a súa relación laboral para subtraer a tarxeta, comunicando á empresa o seu suposto extravío.
A Benemérita procedeu á detención desta persoa, como presunto autor dun delito continuado de estafa, poñéndoo, xunto coas actuacións realizadas, ao dispor do Xulgado de Instrución de garda de Ferrol.
