A portavoz nacional do BNG, Ana Pontón, asegurou este luns en Santiago que a formación nacionalista afrontará as eleccións xerais do próximo 29 de novembro «a por todas, sen límite e con ilusión», co obxectivo de aumentar a representación de Galicia en Madrid e avanzar en dereitos sociais.
Pontón reivindicou o traballo desenvolvido polo Bloque durante a pasada lexislatura e defendeu que, cun único deputado no Congreso e unha senadora, a formación conseguiu máis avances para Galicia que os representantes galegos das forzas estatais. Entre os logros citou os descontos de até o 75% nas peaxes da AP-9 e da AP-53, a transferencia da AP-9, a quita de 4.000 millóns de euros da débeda, o incremento do financiamento da dependencia e a mellora das pensións máis baixas.
«Máis dereitos e máis forza para Galiza é o obxectivo que temos desde o BNG», sinalou a líder nacionalista, que presentou estas eleccións como unha oportunidade para facer valer os intereses galegos e conseguir novos avances sociais.
Unha candidatura que se decidirá mediante un proceso participativo
O BNG abrirá este mesmo luns pola tarde, na reunión da súa Executiva, o proceso de elaboración das candidaturas e dos programas electorais. Pontón destacou que será un procedemento democrático e participativo, no que os nomes das listas sairán das asembleas comarcais.
Preguntada pola continuidade do deputado Néstor Rego e da senadora Carme da Silva, a portavoz nacional asegurou que ambos «terán un papel relevante», aínda que evitou anticipar a decisión definitiva. «Gústame ser respectuosa coa organización», explicou, antes de sinalar que será o conxunto do BNG quen valore o traballo realizado e determine as candidaturas.
Pontón insistiu en que o Bloque concorre á cita electoral sen poñerse límites e coa intención de «gañar», ao considerar que a presenza dunha forza nacionalista con capacidade de decisión en Madrid é fundamental ante o que cualificou de «centralismo das forzas estatais».
O BNG como alternativa ao PP
A líder nacionalista situou o BNG como unha «alternativa clara» fronte ao PP que cualificou como «o máis ultra da historia». Segundo Pontón, os populares representan discursos de odio e desigualdade, ademais de políticas que favorecen a especulación coa vivenda, os recortes nos servizos públicos e os ataques á lingua galega.
Neste sentido, acusou o partido de Alberto Núñez Feijóo e Alfonso Rueda de situarse «do lado dos fondos voitre», do lobby eléctrico e da banca, en lugar de defender os intereses das maiorías sociais. Fronte a iso, reivindicou o Bloque como un «dique de contención» ante unha dereita que, ao seu xuízo, «está botada ao monte».
Pontón tamén criticou o Goberno central, ao que acusou de non ter aproveitado os seus oito anos no poder para afrontar problemas como o acceso á vivenda. Como exemplo, referiuse ao recente desafiuzamento de Maricarmen, unha muller de 87 anos, para cuestionar a actuación do Executivo de Pedro Sánchez.
«No tempo de desconto non se pode solucionar o que non se fixo durante oito anos», afirmou, antes de reclamar máis decisión para defender á cidadanía fronte aos intereses dos grandes poderes económicos. Tamén lembrou que o BNG foi crítico coa política de vivenda do Goberno e co incremento do gasto militar, ao considerar que deberían priorizarse os investimentos sociais.
«Desde o medo non se consegue absolutamente nada»
Ante a campaña electoral que agora comeza, Pontón prognosticou unhas semanas «moi intensas» nas que, segundo advertiu, haberá quen tente mobilizar o electorado desde o medo. Fronte a esa estratexia, apelou á esperanza, á ilusión e á convicción de poder gañar.
«Hai que ir votar desde a ilusión e desde a convicción, non conformándonos co mal menor, senón dicindo que queremos gañar un futuro mellor», afirmou.
Ese futuro, explicou, pasa por unha Galicia con maior benestar social, salarios suficientes para chegar a fin de mes, unha vivenda accesible e unha sanidade pública forte. Tamén puxo o foco nas dificultades da mocidade para emanciparse e no prezo das habitacións, que nalgúns casos xa alcanzan os 700 euros.
Pontón defendeu así a necesidade de reforzar o BNG nas urnas para que Galicia teña maior capacidade de decisión no Estado. «O voto do BNG sempre suma a favor de Galicia, sexa cal for a circunscrición», afirmou, ao tempo que presentou a formación nacionalista como unha forza con «mans libres» para defender os intereses do país.
«Estamos preparados», concluíu a portavoz nacional, que asegurou que o BNG chega ao 29-N «co aval do traballo realizado e coa intención de conseguir máis forza para Galiza e máis avances para as maiorías sociais«.