O directorio de empresas que o Concello de Ferrol puxo en marcha para informar sobre os negocios que están a prestar o seu servizo durante o estado de alarma conta xa con preto de cincuenta establecementos.
Os datos que indicarán son, entre outros, o tipo de produtos ou servizos que ofrecen, se os locais permanecen abertos, o horario de atención ao público, a posibilidade de efectuar compras a domicilio e as condicións deste servizo ou os métodos para realizar pedidos, facilitando a súa páxina web, o seu teléfono de contacto, o seu número de WhatsApp ou o seu perfil de Facebook.
A curto prazo, esta páxina web servirá para proporcionar á cidadanía datos actualizados sobre os medios de contacto e os servizos que ofrecen os establecementos, como o reparto de produtos a domicilio, facilitando deste xeito a realización das compras nestes días de confinamento.
Pero toda esta información que se recolla tamén servirá de base para crear unha aplicación de venda on-line para os negocios locais. A intención é que esta app teña un funcionamento similar ao de calquera das plataformas de comercio electrónico que funcionan na actualidade.
