O Bloque nacionalista Galego de Ferrol presentou unha moción ao pleno do vindeiro xoves na que propón que se aproveite a actual limitación de tráfico para iniciar o camiño da peonalización integral do barrio da Madalena. Así mesmo os nacionalistas instan ao goberno local a «habilitar espazos públicos que prioricen o tránsito peonil e a desenvolver un estudo de cara a establecer zonas e percorridos peonís noutras zonas da cidade que poderán ter a condición de carácter temporal ou definitivo»
O BNG considera que a situación da mobilidade urbana en Ferrol «precisa dunha revisión urxente e que este é o momento de executar proxectos, como a peonalización do barrio da Madalena, que a cidade leva anos agardando». Esta medida ademais, din os nacionalistas, «contribuirá a posta en valor do casco histórico e a súa revitalización».
«É o momento de tomar decisións, de planificar medidas concretas que redefinan os ámbitos peonís e os de tráfico rodado da cidade fuxindo da adopción de medidas baseadas na improvisación. Cómpre aproveitar sinerxias positivas como a apertura da renovada praza de Armas para avanzar definitivamente no proceso de peonalización permanente que esta cidade precisa e ao que os gobernos locais sempre se mostraron recelosos», explicou o voceiro do Bloque, Iván Rivas.
