O Concello de Ferrol vai a repartir 6.000 máscaras máis, enviadas onte pola Deputación da Coruña, entre a poboación da cidade e os profesionais que as precisen para desenvolver o seu traballo, co fin de combater a propagación do COVID-19. O alcalde, Ángel Mato, acompañado pola deputada provincial e concelleira de Obras e Servizos, Ana Lamas, e o concelleiro de Seguridade, Germán Costoya, recibiu no día de onte todo o material no antigo Hospicio de Ferrol, desde onde se distribuirá ao longo dos próximos días.
“Esta entrega é un exemplo máis de que todas as administracións estamos a traballar e a colaborar para
frear a expansión do virus”, explicou Mato. Ademais da próxima entrega das 6.000 máscaras enviadas dende a Deputación provincial, o Concello vén de repartir esta mesma mañá máis material de protección entre os traballadores e clientes dos mercados municipais da Magdalena, Recimil e Caranza.
O edil Germán Costoya informou de que no primeiro repartiu outras 200 unidades, 400 luvas de vinilo, 1.000 de plástico para clientes, 2 botes de hidroalcohol de medio litro e unha garrafa de cinco litros. No de Recimil entregouse o mesmo material, e no caso do de Caranza repartíronse 100 máscaras hixiénicas, 200 luvas de vinilo, 500 de plástico, un bote de xel de hidroalcohol de medio litro e unha garrafa de cinco litros. Desde o Concello, explicou o edil, “estamos a poñer a disposición da nosa cidadanía todos os medios de protección que temos a noso alcance”.
