Becerreá volve poñer o foco na súa historia coa creación dun novo mural do artista lucense Diego As, que acaba de finalizar unha obra de grandes dimensións nun edificio situado xunto á N-6. A obra recrea a Batalla de Cruzul, un episodio clave da Guerra da Independencia que tivo lugar en 1809 e no que os veciños da zona se enfrontaron ao exército napoleónico.
Todo un reto para Diego As e Van Kraft
O mural, elaborado ao longo de dúas semanas en diferentes xornadas, supuxo un reto técnico pola altura da fachada e polo uso dun andamio de ata nove niveis. O artista, que viña de recuperarse dunha lesión, contou coa colaboración de Pablo Lage (Van Kraft) para completar o traballo.
A peza destaca pola presenza dun soldado francés en primeiro plano, unha figura que o muralista escolleu para transmitir a tensión do momento histórico e o avance das tropas cara ao municipio. Xunto a el, aparecen elementos simbólicos como o ponte de Cruzul, infraestrutura esencial no século XIX e recentemente recoñecida como Ben de Interese Cultural.
Unha aposta pola historia de Becerreá
O encargo partiu do Concello de Becerreá, que busca reforzar a difusión deste acontecemento e apoiar a recreación histórica que cada ano organizan as asociacións locais. O mural xa é visible desde a estrada e convértese nun novo atractivo cultural para quen atravesa a vila. O artista, que traballa actualmente noutra obra en Palas de Rei, anima a descubrir dende as súas redes sociais un episodio que segundo el é descoñecido aínda para moita xente.