A Mesa pola Normalización Lingüística convocou unha concentración para o vindeiro mércores 7 de outubro diante do Parlamento de Galicia, en Santiago de Compostela, coincidindo coa sesión plenaria na que está previsto debater e votar a actualización do Plan Xeral de Normalización da Lingua Galega. A entidade pretende denunciar o que considera un intento de rachar cos consensos sociais construídos arredor da política lingüística.
O presidente da organización, Marcos Maceira, sostén que o documento que chegará á Cámara autonómica non supón unha actualización do plan actualmente vixente, senón, ao seu xuízo, “unha regresión nacida da chantaxe que quixo impor o PP”. A Mesa considera que a principal consecuencia práctica do novo texto será manter as limitacións ao uso do galego no ensino mediante porcentaxes máximas e trasladar aos claustros dos centros educativos parte da responsabilidade sobre a súa aplicación.
A organización critica tamén o papel do PSdeG, ao que acusa de “ceder á chantaxe” do Partido Popular polo acordo para sacar adiante a actualización do plan. Maceira reclama aos socialistas que rectifiquen e recuperen a posición de compromiso co Plan Xeral de Normalización que, segundo lembra, mantiveron desde 2004.
Críticas ao marco normativo
A Mesa cuestiona ademais o papel da Xunta na regulación dos usos lingüísticos e cualifica o novo plan de “documento sen valor xurídico”. Maceira acusa o PP de actuar como se o Goberno galego non tivese capacidade para modificar as normas que, segundo a entidade, restrinxen a presenza do galego ou como se non fose responsable da súa elaboración e aprobación.
O Plan Xeral de Normalización da Lingua Galega constitúe o marco de referencia da política lingüística galega e recolle máis de 400 medidas destinadas a favorecer o uso do idioma en distintos ámbitos sociais. A Xunta previra que a súa renovación servise para impulsar novas actuacións de promoción do galego.
Reivindicación da ILP Lingua Vital
A Mesa vincula tamén a convocatoria coa Iniciativa Lexislativa Popular (ILP) Lingua Vital, promovida pola plataforma Queremos Galego e rexistrada no Parlamento poucas semanas antes do anuncio do novo plan.
Segundo Maceira, esta iniciativa é “a única proposta con accións efectivas que comprometen e obrigan a Xunta e os poderes públicos”. A organización adianta así que continuará reclamando un marco legal que, fronte ás actuais limitacións, non estableza restricións ao uso do galego.
A concentración do 7 de outubro terá lugar diante do Pazo do Hórreo, onde A Mesa pretende visualizar o rexeitamento da entidade ao texto que será sometido á consideración do Parlamento galego.