Galicia volverá encher as rúas este 1 de maio con motivo do Día Internacional do Traballo, nunha xornada marcada pola mobilización sindical e social en defensa dos dereitos laborais, a democracia e a mellora das condicións de vida da clase traballadora. As principais organizacións sindicais e colectivos convocan manifestacións en múltiples cidades e vilas do país, con mensaxes que van desde a loita polos salarios e a vivenda ata a denuncia do contexto internacional e político.
Un Primeiro de Maio marcado pola defensa dos dereitos e da democracia
UGT e CCOO fan un chamamento á participación baixo o lema “Dereitos, non trincheiras. Salarios, vivenda e democracia”, nun momento que cualifican de decisivo tanto para as condicións de vida da clase traballadora como para a propia calidade democrática. Ambas organizacións sitúan no centro das reivindicacións cuestións como a redución da xornada laboral, a mellora dos salarios, o acceso á vivenda, a igualdade ou o fortalecemento dos servizos públicos.
O acto central destas centrais sindicais terá lugar na Coruña, onde se celebrará a manifestación principal coa presenza das súas direccións galegas. Ademais, lembran que o Primeiro de Maio tamén debe servir como unha chamada internacional pola paz, fronte á guerra, o militarismo e o cuestionamento dos dereitos humanos.
A CIG sitúa o foco na situación política e social en Galicia
Pola súa banda, a CIG traslada este ano o seu acto central a Lugo, nun contexto que define como de “especial gravidade” pola situación política e social en Galicia. A central nacionalista denuncia unha deriva “autoritaria e antidemocrática” e chama á mobilización masiva para frear o avance do que consideran políticas regresivas e recortes de dereitos.
A Mocidade Socialista tamén sae á rúa
A Coordinadora da Mocidade Socialista convoca en Santiago de Compostela unha mobilización propia, coa que pretende activar á mocidade traballadora galega fronte ao militarismo, o avance da extrema dereita e as condicións de precariedade.
Manifestacións dos sindicatos e entidades
CIG
A Confederación Intersindical Galega convoca arredor de vinte mobilizacións por todo o país. O acto central será en Lugo (12:00 horas, desde o Edificio Sindical). Ademais, destacan:
- Lugo (acto central): 12:00 horas (Edificio Sindical, Ronda da Muralla)
- Vigo: 12:00 horas (Cruce da Dobrada)
- A Coruña: 12:00 horas (Praza de Vigo)
- Ferrol: 12:00 horas (Local Sindical, Esteiro)
- Ourense: 11:30 horas (Praza Maior)
- Pontevedra: 12:00 horas (Pasantería)
- Santiago de Compostela: 12:00 horas (Praza Roxa)
- A Estrada: 12:00 horas (Praza do Mercado)
- A Guarda: 12:00 horas (Praza Avelino Vicente)
- As Pontes: 12:00 horas (Praza de América)
- Cangas: 18:00 horas (desde o Concello)
- Carballo: 12:00 horas (Praza do Concello)
- Cee: 12:00 horas (Praza de Otero Lastres)
- Foz: 12:00 horas (Praza de Galiza)
- Monforte: 12:00 hhoras (Praza de España)
- O Porriño: 12:00 horash (Praza do Concello)
- Ribeira: 12:00 horas (Mercado Municipal)
- Verín: 12:00 horas (Praza do Concello)
- Vilagarcía: 11:30 horas (Avda. da Mariña)
- Vilamartín de Valdeorras: 12:00 horas (Praza José Luís Núñez)
UGT e CCOO (mobilizacións conxuntas)
As dúas centrais convocan manifestacións conxuntas nas principais cidades galegas, con acto central na Coruña:
- A Coruña: 12:00 (Praza da Palloza)
- Ferrol: 12:00 (Praza do Inferniño)
- Santiago: 12:00 (Alameda)
- Lugo: 12:30 (Casa Sindical)
- Ourense: 12:00 (Subdelegación do Goberno)
- Pontevedra: 13:00 (Praza da Ferrería)
- Vigo: 12:00 (Barco de Coia – Alfageme)
- Vilagarcía: 12:00 (Praza de Ravella)
Ademais das manifestacións, tamén están previstos actos previos como ofrendas florais en varias cidades, segundo recolle o programa oficial.
Coordinadora da Mocidade Socialista
A organización xuvenil convoca unha mobilización nacional en Santiago de Compostela, que partirá da Praza Roxa ás 19:30 horas.
Trátase da primeira convocatoria propia da entidade neste día, coa que buscan mobilizar á mocidade traballadora galega e facer fronte ao avance do militarismo e da extrema dereita, reivindicando a organización política da xuventude en clave socialista.
