Galicia despedirá un verán excepcionalmente cálido para dar paso a un outono que, segundo a Axencia Estatal de Meteoroloxía (Aemet), será máis quente e máis chuvioso do habitual despois dun balance climatolóxico que confirma que a estación estival de 2026 foi a máis cálida desde que existen rexistros en 1961.
Un verán extremo: calor persistente e tres ondas de calor
As temperaturas de xuño e xullo foron moi cálidos tanto no interior como na costa. En moitos puntos superáronse os 40 graos a finais de xuño, e cidades como A Coruña rexistraron valores case históricos con 35,9ºC. As noites tropicais, con mínimas por riba dos 20 graos convertéronse nun fenómeno recorrente en toda a comunidade.
O verán estivo marcado tamén por tres ondas de calor que afectaron Galicia de maneira menos intensa que ao resto da Península, pero que contribuíron a un trimestre de temperaturas moi elevadas e unha insolación case récord. En canto ás precipitacións, xuño e xullo foron moi secos, mentres que agosto rompeu a tendencia cun episodia de chuvias intensas nos últimos dez días. Aínda así o balance do verán mantense deficitario e a comunidade continúa vivindo das rendas dun inverno moi chuvioso.
O que vén: un outono cálido e con máis chuvias
A primeira metade de setembro está a ser máis calida e máis seca do normal, e non se agardan precipitacións relevantes ata outubro. A Aemet prevé que outubro, novembro e decembro presenten temperaturas superiores ás habituais en Galicia. No referente á chuvia, a axencia apunta unha maior probabilidade de que o trimestre sexa máis húmido do normal, especialmente na vertente atlántica.
El Niño e fenómenos extremos
O delegado da Aemet tamén alertou da intensificación do fenómeno El Niño, que está a provocar eventos meteorolóxicos máis extremos a nivel global. Este episodio podería derivar en temperaturas máis altas, períodos de seca e precipitacións moi intensas, con impacto directo nas zonas tropicais e efecos indirectos en latitudes medias como Galicia.