Galicia pechou o mes de agosto cun avance notable na afiliación de persoas estranxeiras á Seguridade Social, sumando 2.713 cotizantes máis. O incremento mensual, do 2,88%, sitúase claramente por riba da media estatal, que apenas superou o 1%.
O Ministerio de Inclusión e Seguridade Social destaca que o mercado laboral galego continúa a absorber man de obra procedente doutros países, tanto na Unión Europea como de fóra dela. En total, a comunidade conta xa con 96.819 afiliados estranxeiros, dos cales 76.525 proceden de países non comunitarios e 20.294 pertencen á UE.
Venezuela, Colombia e Portugal, á cabeza das nacionalidades
A composición da afiliación mantén a mesma estrutura que en meses anteriores: Venezuela continúa como principal país de procedencia, con 16.661 traballadores, seguida de Colombia (12.659) e Portugal (10.057). O perfil laboral mostra tamén que 54.371 son homes e 42.447 mulleres.
As catro provincias medran por riba do 3%
O aumento de afiliación repítese en todo o territorio galego, sendo A Coruña quen suma 1.174 novos cotizantes e tendo en total 40.506. Pontevedra engade 770 e chega aos 29.522, Lugo incorpora 433 e sitúase en 14.563 e Ourense medra en 335 e chega aos 12.227. A maioría dos traballadores estranxeiros están inscritos no Régimen General (81.961), mentres que 12.657 figuran como autónomos e 2.201 no réxime do mar.
No conxunto do Estado, a afiliación de persoas estranxeiras tamén experimentou un avance significativo, con 39.535 cotizantes máis en agosto e un total de 3.551.759, a cifra máis alta rexistrada ata o momento. O crecemento interanual supera o 15%, impulsado en parte polo proceso extraordinario de regularización iniciado a finais de abril.