O alcalde de Vilagarcía, Alberto Varela, deixou claro no Solifest deste domingo que cumpre o que promete. Durante a presentación do evento solidario no centro Princesa Letizia anunciouse a instalación dun punto de tatuaxes, e foi aí cando o rexedor asegurou que se animaría a participar, dando pé ao “compromiso” compartido co deputado provincial, Javier Tourís.
E así foi: este domingo Varela materializou aquela promesa feita á veciñanza. Sumouse á iniciativa dos tatuaxes con fins solidarios, unha tendencia que, segundo el mesmo recoñece, non lle é allea, xa que conta con varios tatuaxes e declárase afeccionado a eles.
Unha tatuaxe con significado
Máis alá de cumprir a súa promesa e de facelo por unha causa solidaria, o xesto tiña tamén unha carga emocional especial. O alcalde explicoulle á Asociación Veciñal Breogán que se trataba dunha homenaxe persoal: “vou tatuar o número 77 en lembranza dun amigo moi afeccionado ao baloncesto que xa non está. Foi o último número co que xogou”.
O Solifest, máis ca unha causa solidaria
Alberto Varela animaba así aos veciños de Vilagarcía a sumarse ás tatuaxes e demais actividades coas que contou o Solifest, un punto de encontro que transforma O Piñeiriño e toda a localidade de Vilagarcía nunha celebración con sentido. Este 2026, o evento cumpría 3 anos, afianzándose como un proxecto nacido da colaboración entre a Asociación de Veciños e Amencer-ASPAC, impulsado pola ilusión colectiva.
A esencia do festival é clara: aproveitar a música, a comida e o ambiente festivo para xerar un impacto real. Todo o que se recauda destínase integramente a apoiar os programas do Centro de Atención Integral Princesa Letizia de Amencer-ASPACE e a manter o seu traballo diario. Cada persoa que participa contribúe directamente a financiar terapias, atención médica, material especializado e actividades que melloran o día a día das persoas con parálise cerebral.
Con todo, SOLIFEST non se queda só na parte solidaria. Tamén pretende dar visibilidade e promover a conciencia social, ofrecendo un espazo onde o lecer e o compromiso conviven. O evento busca derrubar barreiras, cuestionar prexuízos e demostrar que unha sociedade máis inclusiva non só é posible, senón necesaria.
