A pasada fin de semana, o atletismo galego ocupou un lugar destacado no Campionato de España absoluto ao aire libre. O Estadio Ciudad de Málaga outorgou a Galicia oito medallas: tres ouros, dúas pratas e tres bronces, demostrando a virtuosidade do atletismo galego.
A xornada do venres foi inaugurada por Daniel Chamosa, quen conseguiu a medalla de bronce nos 10.000 metros marcha cun tempo de 39:22.48. Este foi superado polo atleta Paul McGrath, campión con 38:23.52, e Óscar Martínez coa medalla de prata polos seus 39:03.59.
Na categoría feminina, a marcha volveu dar a vitoria a dúas campioas galegas. Tras o ouro de María Pérez, a pontevedresa Antía Chamosa proclamouse subcampioa con 44:07.51 nos 10.000 metros, seguida da lucense Aldara Meilán, quen rexistrou 44:43.51.
A segunda medalla de prata conseguiuna o salmantino veciño de Marín, David de la Fuente, quen nos 5.000 metros conseguiu un tempo de 13:59.70.
Os ouros chegarían o domingo, onde o protagonismo o tiveron o mediofondo e os lanzamentos. A hispanocubana establecida na Coruña, Yulenmis Aguilar, impúxose como a campioa na final de xavelina cun mellor intento de 59,78 metros. Por debaixo dela situáronse Paula Redondo, con 48,15 metros, e Enya Carretero cun terceiro posto polos seus 47,92 metros.
Pouco despois chegaría o triunfo de Adrián Ben, quen conseguiu o ouro nos 1.500 metros e cruzou a meta en 3:47.54. A este seguírono Carlos Sáez e Mariona García, con 3:47.85 e 3:47.96 respectivamente.
E o terceiro ouro galego chegou da man da mugardesa Belén Toimil, quen volveu demostrar o seu dominio no lanzamento de peso e conseguiu o seu sétimo título consecutivo ao aire libre. A deportista mantén desde 2020 unha xeira de vitorias que a converten na gran referencia nacional desta especialidade.
Pedro Osorio deulle a última medalla a Galicia, conseguindo o bronce na final de 800 metros, cun tempo de 1:47.35.
O Campionato de España demostrou unha vez máis a calidade do atletismo galego con Adrián Ben, Yulenmis Aguilar e Belén Toimil no máis alto do podio; seguidos de David de la Fuente e Antía Chamosa no segundo posto; e Daniel Chamosa, Pedro Osorio e Aldara Meilán, que conseguiron a medalla de bronce nas súas respectivas probas.
