O BNG non participou este mércores na primeira reunión entre os grupos parlamentarios para analizar a proposta de actualización do Plan Xeral de Normalización da Lingua Galega de 2004, presentada a pasada semana pola Xunta de Galicia. A formación nacionalista, que xa avanzara esta decisión, considera que as negociacións deben comezar cunha reunión ao máis alto nivel entre a portavoz nacional, Ana Pontón, e o presidente da Xunta, Alfonso Rueda.
Ao encontro acudiron representantes do PPdeG, PSdeG e Democracia Ourensana, que iniciaron os primeiros contactos para avanzar no denominado Pacto pola Lingua, mentres o Bloque mantén a súa postura de non participar nas reunións parlamentarias ata que se produza ese encontro bilateral.
O PP lamenta a ausencia do Bloque
Ao remate da reunión, a portavoz de Educación do PP no Parlamento galego, Carmen Pomar, agradeceu a disposición amosada polo PSdeG e Democracia Ourensana para participar nesta primeira toma de contacto. Pola contra, criticou a ausencia do BNG, ao que acusou de manter desde o inicio unha «actitude negativa e de rexeitamento».
Pomar rexeitou tamén a petición dos nacionalistas de reunirse en exclusiva con Alfonso Rueda, ao considerar que iso situaría ao BNG nunha posición de privilexio respecto ao resto das formacións políticas. Ademais, defendeu que o Parlamento é o espazo axeitado para debater este documento e asegurou que o PP está «absolutamente aberto» a manter todas as reunións necesarias para alcanzar un acordo.
O PSdeG traballará en propostas de mellora
Pola súa banda, a deputada socialista Silvia Longueira anunciou que o PSdeG presentará propostas para ampliar e analizar en profundidade o documento elaborado pola Xunta.
Os socialistas elaborarán un plan de acción durante os meses de agosto e setembro, contando coas persoas que participaron nas comisións de traballo, co obxectivo de fixar a súa posición definitiva sobre o texto antes do inicio do novo curso político.
Longueira afirmou que é prioritario comprobar se a proposta responde á «emerxencia lingüística» que, ao seu xuízo, vive Galicia. Tamén defendeu revisar o actual decreto do plurilingüismo, ao entender que o galego, como lingua minorizada, non pode partir en igualdade de condicións co castelán. Neste sentido, o PSdeG estudará se debe ser modificado, substituído ou eliminado.
O BNG insiste nun diálogo directo coa Xunta
A próxima reunión dos grupos parlamentarios está prevista para o 28 de xullo, unha cita na que tampouco se prevé a participación do BNG.
A deputada nacionalista Noa Presas reiterou que a súa formación non acudirá a unhas reunións que considera unha «cerimonia propagandística», ao entender que a proposta presentada polo Goberno galego rebaixa a protección da lingua.
Segundo explicou, o documento deixa atrás medidas recollidas no Plan Xeral de Normalización Lingüística de 2004, como a referencia a un mínimo do 50 % do ensino en galego, polo que cualificou a proposta como un «catálogo de rebaixas». Presas insistiu en que o BNG mantén a súa disposición ao diálogo, pero reclama que este se produza directamente entre Ana Pontón e Alfonso Rueda.
A Xunta pide ao Bloque que se incorpore ao proceso
Pola súa parte, o conselleiro de Cultura, Lingua e Xuventude, José López Campos, lamentou a ausencia do BNG e cualificouna como unha «oportunidade perdida».
O responsable autonómico lembrou que os nacionalistas abandonaran o proceso do Pacto pola Lingua hai aproximadamente ano e medio e fixo un chamamento para que se reincorporen ás negociacións. Así mesmo, mostrouse convencido de que, unha vez avance o traballo parlamentario, Alfonso Rueda manterá encontros coas distintas forzas políticas para tratar de pechar un gran acordo de país sobre o futuro da lingua galega.
