A Plataforma Queremos Galego presentou este mércores a manifestación que terá lugar o domingo 23 de febreiro, Día de Rosalía, en Santiago de Compostela, para reclamar solucións fronte á emerxencia lingüística e esixir á Xunta un cambio de actitude e a activación de todos os recursos para reverter a tendencia do galego.
Así o detallaron este mércores, nunha rolda de prensa en Compostela, o portavoz da Plataforma e presidente da Mesa pola Normalización Lingüística, Marcos Maceira, e a coordinadora de Queremos Galego, Celia Armas.
“Do mesmo xeito que Rosalía inaugurou o rexurdimento do galego na literatura, o día do seu nacemento marcará o inicio do rexurdimento do noso idioma co compromiso e implicación do pobo galego”, sinalou Celia Armas.
Baixo o lema ‘Lingua vital xa!’, a marcha partirá ás 12:00 horas do Parque da Alameda e rematará na Praza do Obradoiro, onde haberá unha actuación musical. Así, Marcos Maceira incidiu en que cómpre reactivar o Plan Xeral de Normalización da Lingua Galega (PXNLG) como o “gran pacto real” polo idioma.
“Teñen que actuar xa”, subliñou Maceira, ao tempo que denunciou un “pacto para enterrar o galego” por parte da Xunta, fronte á cidadanía que busca o “impulso para a vida” do galego, un idioma “vital para Galicia”.
Sobre o proceso do PXNLG aberto pola Xunta, Maceira lembrou que, tras a asemblea de Queremos Galego en Santiago o 17 de novembro, o conselleiro de Cultura, Lingua e Xuventude, José López Campos, recibiu á Mesa pola Normalización Lingüística.
Nese encontro, puntualizou Maceira, a Plataforma amosou a súa “disposición” a colaborar na reactivación do PXNLG como “gran acordo nacional” polo idioma. Todo isto, engadiu, sempre dentro dun “proceso amplo, plural, participado e transparente”.
Nesa reunión, A Mesa pediu que a Xunta amosase o seu compromiso coa aplicación do Plan e asumise “uns puntos mínimos e urxentes” para actuar fronte á “emerxencia lingüística extrema”, en liña co indicado polo PXNLG e polo Consello de Europa.
Despois dese encontro, Maceira lamentou que “non teñen máis noticias” que o nomeamento unilateral dunha comisión da que “non coñecen” funcionamento, obxectivos ou “quen e como” van asumir os seus acordos, así como as “intencións da Xunta” de convertela nun espazo de “revisión e non de reactivación e cumprimento” do PXNLG.
“Que dende hai un mes non teñamos máis noticia que o nomeamento unilateral dunha comisión da que non coñecemos funcionamento, obxectivos ou quen e como se van asumir os seus acordos, e das intencións da Xunta de convertela nun espazo de revisión e non de reactivación e cumprimento do PXNLG, fala moi pouco de participación e transparencia”, criticou Maceira.
“Na actualidade, non só traballan —en referencia á Xunta— para eliminar as liñas vermellas, senón que están a impoñer outras novas”, denunciou. Todo isto, en referencia, entre outros asuntos, á aprobación dunha lei que “abre a porta” a que a TVG “deixe de usar” o galego.
