A Romaría da Nosa Señora dos Remedios da Ermida, en Quiroga (Lugo), foi declarada Ben de Interese Cultural (BIC) pola Xunta, segundo a resolución publicada este martes no Diario Oficial de Galicia. A celebración, que ten lugar cada ano os días 8 e 9 de setembro, recibe así o recoñecemento polo seu destacado valor cultural e pola singularidade dunha tradición que se mantivo ao longo dos séculos.
O expediente destaca o carácter propio desta romaría fronte a outras celebracións de Galicia, xa que o seu desenvolvemento está marcado por unha representación escénica na que se simboliza a loita entre a fe e o mal, encarnado na figura do Meco.
Unha tradición transmitida durante xeracións
A celebración mantén diferentes elementos que forman parte da súa identidade. Entre eles están as ‘amortalladas’, que acompañan a Virxe durante o percorrido, mentres que o Meco e as ‘Pampórnigas’, dous xigantes que representan un home e unha muller, participan tamén da festa ao son da gaita.
Un dos momentos máis significativos prodúcese cando a imaxe da Virxe entra na igrexa. Nese instante, o Meco postráse ante a Virxe e ante o pobo, nunha escena que o expediente patrimonial interpreta como unha representación do templo como espazo de protección e refuxio fronte ao mal.
A declaración salienta ademais a continuidade histórica da romaría, celebrada desde hai séculos con escasas modificacións e conservando os seus elementos tradicionais. Esta permanencia permitiu manter a súa autenticidade a pesar de que no século XVIII as autoridades eclesiásticas e civís chegaron a prohibir a presenza de xigantes e cabezudos nalgunhas celebracións.
Con este recoñecemento, a Romaría da Nosa Señora dos Remedios da Ermida pasa a contar coa máxima protección patrimonial como manifestación cultural, en atención á súa antigüidade, continuidade e singular posta en escena.