Mondoñedo prepárase para despedir as San Lucas coa música e a cultura galega como protagonistas. A celebración, que chega este ano á súa 870ª edición, ofrecerá este sábado unha programación especial con actividades durante todo o día e dous concertos gratuítos na Praza da Catedral: os de Xabier Díaz & Adufeiras de Salitre e Luar na Lubre.
A xornada forma parte da iniciativa Terra de encontros, impulsada pola Deputación de Lugo en colaboración coa Asociación As San Lucas de Mondoñedo, e combina música en directo, xogos populares e actuacións de grupos tradicionais para dar protagonismo á cultura e ás agrupacións da comarca.
Xogos, pasarrúas e folclore desde o mediodía
As actividades comezarán ás 12.00 horas na Praza da Catedral, con xogos tradicionais organizados por Xotramu. Pola tarde, ás 17.00 horas, os pasarrúas percorrerán distintos puntos da cidade, con saídas desde a Alameda, o barrio dos Muíños e o Auditorio Municipal Pascual Veiga.
A programación continuará cun encontro folclórico no Seminario de Santa Catalina, no que participarán Os do 21, do Vicedo; A Subela, de Foz; e Ledicia, de Burela. A proposta reunirá así diferentes expresións da música e do baile tradicional galego.
Dous concertos para pechar a festa
A música tomará a Praza da Catedral pola noite. Ás 20.30 horas actuará Xabier Díaz & Adufeiras de Salitre, unha das formacións destacadas da música tradicional galega contemporánea. O proxecto combina a voz de Xabier Díaz coa percusión e os acompañamentos vocais das Adufeiras de Salitre.
Ás 22.30 horas será a quenda de Luar na Lubre, un dos grupos máis recoñecidos do folk galego, cunha traxectoria marcada pola difusión da música de Galicia dentro e fóra das súas fronteiras.
Con esta programación, Mondoñedo encara a recta final das San Lucas cunha xornada que une tradición, música en directo e participación cultural, antes de despedir unha das celebracións máis emblemáticas da cidade.