O Concello de Cariño vén de solicitarlle ó Departamento de Sanidade da Xunta de Galicia que volva permitir o consumo de auga potable no municipio —prohibido dende o pasado mes de novembro—, toda vez que a última análise da Administración arroxou resultados «óptimos» con respecto ós niveis de níquel.
«Solicitamos o peche de todas as incidencias abertas e a autorización para poñer fin á prohibición da inxesta de auga tratada que abastece ás parroquias de Cariño e A Pedra», reclama o concello, que agarda unha resposta «á maior brevidade». Mentres tanto, segue «traballando nunha solución estable para esta seria problemática de orixe natural».
Así, o Concello de Cariño encargou un estudo para abordar as posibles actuacións a realizar para evitar futuras situacións similares no futuro. En concreto, a actuación na estación potabilizadora para atallar problemas específicos de níquel e trihalometanos requeriría un investimento de 140.000 euros. Xa está a prepararse a licitación deste proxecto, para o que se solicitou unha transferencia de crédito de 146.000 euros.
