Enorme éxito na primeira xornada da campaña de recollida de alimentos e produtos de hixiene impulsada polo Concello de Narón para axudar ás familias máis vulnerables. A campaña comezou onte pola mañá e en tan só catro horas, nos catorce establecementos nos que estiveron os voluntarios e voluntarias, recolléronse máis de 1.500 quilos de produtos.
As doazóns poden realizarse entre as 10.00 e as 14.00 horas e ata o vindeiro sábado, día 9, nos supermercados das cooperativas do Val (no Val e en Xuvia) e Meirás (San Mateo), nos Covirán de Xuvia e O Alto, no Dia do Ponto, xunto aos Froiz de Freixeiro, Santa Icía, A Gándara e o Centro Comercial Narón, nos Gadis da estrada de Cedeira e Santa Icía, no Familia de Santa Icía e no Eroski da Gándara.
Os alimentos e produtos de hixiene que rexistran máis demanda son os cereais, legumes e froita en conserva, café, arroz e tamén produtos de hixiene (compresas, tampóns), de limpeza (deterxentes para fregar a louza e o chan, lixivia…) e tamén toalliñas hixiénicas para bebés, entre outros.
“Unhas corenta persoas voluntarias forman parte deste equipo que, coordinado por Protección Civil de Narón, nos permite levar a cabo esta campaña e recoller os produtos doados para levalos ao Centro de Recursos Solidarios de Narón e, dende alí, atender ás familias que o precisan”, destacou a alcaldesa Marián Ferreiro.
