A celebración da Festa da Auga de Vilagarcía non supuxo un incremento do consumo de auga municipal, segundo os datos facilitados por Espina & Delfín. Ao contrario, o gasto de auga durante o 16 de agosto foi o máis baixo dos seis días analizados, mesmo nunha xornada marcada polas altas temperaturas e por unha maior afluencia de público.
En total, o municipio consumiu 9.201 metros cúbicos de auga durante o día de San Roque, fronte aos 10.145 m³ rexistrados na mesma xornada de 2025. Isto supón unha baixada do 9,3%, a pesar de que a asistencia á Festa da Auga pasou das 30.000 ás 35.000 persoas.
O día con menor consumo da semana
Para analizar o impacto da celebración, comparáronse os datos do 16 de agosto cos dos días anteriores e posteriores. A cifra rexistrada durante a Festa da Auga quedou por baixo de todas as demais: 11.303 m³ o xoves 13, 11.137 m³ o venres 14, 10.257 m³ o sábado 15 e 11.126 m³ o luns 17, tamén festivo.
O dato reforza así a tendencia observada en anos anteriores, segundo o Concello, que sinala que a celebración non provoca un aumento significativo do consumo de auga no conxunto do municipio.
Menos consumo tamén na zona da festa
Os datos permiten afinar aínda máis a análise ao diferenciar as distintas zonas de subministración. Dos 9.201 m³ consumidos en todo Vilagarcía o 16 de agosto, 6.793 m³ corresponderon á zona centro-sur, na que se desenvolve a Festa da Auga.
Esta cifra tamén foi inferior á do ano pasado: supón un 14,5% menos que os 7.951 m³ rexistrados en 2025 nesa mesma área. Un descenso especialmente significativo tendo en conta que a celebración contou este ano con 5.000 asistentes máis.
O lixo si aumenta co público
A evolución foi diferente no caso dos residuos. O incremento de asistentes traduciuse nun aumento da cantidade de lixo recollido no conxunto do municipio, que pasou dos 87.360 quilos de 2025 aos 93.480 deste ano, un 7% máis.
Porén, no propio epicentro da celebración —incluíndo zonas como as praias, o TIR ou Miguel Hernández— retiráronse 2,5 toneladas menos de residuos que na edición anterior. En concreto, pasouse de 46.840 a 44.300 quilos.
Os responsables de Urbaser xa advertiran durante o propio día de San Roque dunha maior dispersión do público durante a noite previa, unha circunstancia que podería explicar que unha parte maior dos residuos se xerase fóra das zonas tradicionalmente máis vinculadas á celebración.