O buque semisumerxible “Fjord” parteu esta mañá do estaleiro de Navantia Fene rumbo a Róterdan coa primeira das tres plataformas flotantes do Programa Kincardine que están preparadas para o seu embarque nos peiraos da factoría fenesa.
No porto neerlandés, que alberga unha enorme área loxística para este proxecto, serán onde se leve a cabo a montaxe das turbinas de 9.6 megawatios fabricadas por Vestas sobre estas estruturas. Posteriormente, levaranse ata o seu emprazamento final, a 15 quilómetros da costa de Aberdeen, en Escocia.
As estruturas contan cunha planta triangular de 70 metros de lado e columnas de 12 metros de diámetro e 30 metros de altura nos vértices. Sobre unha destas tres columnas vai colocado o muíño de vento, que será un dos de maior potencia do mercado eólico.
