A Fundación Exponav súmase aos actos de homenaxe ao polígrafo ferrolán Ricardo Carvalho Calero, ao que este ano se dedica o Día dás Letras Galegas, organizando un maratón de lectura que terá lugar o sábado 31 de outubro na sala Carlos III do edificio de Herrerías e para o que xa está aberto o prazo de inscrición.
Trátase da mesma data que a Real Academia Galega e o Concello de Ferrol elixiron para conmemorar a xornada das Letras Galegas no teatro Jofre, un día despois do aniversario do autor, de cuxo nacemento se cumpren 110 anos o 30 de outubro.
A iniciativa, que se desenvolve en colaboración con Cristina Carballedo, quere destacar a unha das figuras da cultura galega máis importantes do século XX con este maratón no que se lerán fragmentos elixidos polos participantes entre a súa abundante obra de poesía, teatro, contos ou ensaios.
As persoas interesadas en protagonizar esta homenaxe deberán inscribirse enviando o seu nome completo, número de teléfono e libro elixido ao correo [email protected] ou chamando ao número de teléfono 630 285 920.
Debido á situación sanitaria é necesario con- asinar a asistencia con antelación e que cada participante leve o seu propio material de lectura. En ningún momento superarase o aforo de 10 persoas e os asistentes teñen que ir provistos de máscara e respectar a distancia de seguridade.
O horario do maratón de lectura será de 11:00 a 13:30 horas pola mañá e de 17:00 a 19:00 horas pola tarde.
