O Concello de Ferrol vén de iniciar os trámites para poñer en marcha unha Escola de Familias co obxectivo de loitar contra as adiccións entre a mocidade, tal e como anunciou esta mañá a concelleira de Benestar Social, Eva Martínez Montero, tras manter no día de onte unha reunión de traballo coas direccións das asociacións implicadas nesta iniciativa, Ex-alcohólicos e Asfedro (Asociación Ferrolana de Drogodependencias).
A futura Escola municipal de Familias forma parte das accións impulsadas polo Grupo de Traballo de Infancia, Familia e Adolescencia de Ferrol, posto en marcha polo Concello hai agora un ano e do que forman parte as entidades Aspaneps, Ex-alcohólicos, Acción Familiar, Teima Down, Secretariado Gitano, Dignidad, Proinfancia, Asfedro e Ingada.
Martínez Montero explicou que a nova escola estará aberta a pais e nais dos centros públicos e concertados da cidade co fin de abordar as adiccións en catro bloques: ás drogas legais, ás ilegais, ás novas tecnoloxías e, por último, ao xogo e apostas. A formación sobre os dos primeiros correrá a cargo dos expertos da asociación Ex- alcohólicos e as outras dous impartiranse polos de Asfedro.
A nova Escola de Familias terá a súa sede nunha instalación municipal e desde a concellería de Benestar xa se iniciaron os trámites para deseñar a programación da formación que recibirán os proxenitores. Nos próximos días, o departamento que dirixe Martínez Montero comunicará aos centros escolares da cidade e ás anpas o contido da iniciativa.
A edil manifestou a seu agradecemento ás dúas entidades coas que se desenvolverá a iniciativa posto que “levan anos acreditando a súa solvencia tanto na atención aos usuarios como na formación, información e prevención das adiccións”. Neste punto manifestouse “moi satisfeita” dos resultados da “coordinación” do Grupo de Traballo de Infancia, Familia e Adolescencia do Concello, “moi preocupado polo aumento das adiccións entre a nosa mocidade”, manifestou.
