A Xunta Local de Seguridade de Ferrol tratou hoxe nunha reunión celebrada no pazo municipal a situación na que se atopa o barrio de Recimil. Na sesión estiveron presentes o alcalde, Ángel Mato; a subdelegada do Goberno, Pilar López- Rioboo; a vicesecretaria da Delegación do Goberno, Eva Vázquez; o xefe superior de Policía en Galicia, José Luis Balseiro; o inspector xefe da Policía Autonómica, Antonio Nieto; o comisario accidental da Comisaría de Ferrol-Narón, Salvador Campo, e os concelleiros de Seguridade, Germán Costoya, e de Benestar Social, Eva Martínez Montero.
Trala xuntanza, o alcalde agradeceulle á subdelegada “a celeridade” coa que atendeu a convocatoria e que se puxese a disposición do Concello para, “entre todos, poder mellorar as condicións do barrio” e abordar os problemas que xorden. Para Mato, trátase dun camiño que vai requirir certo tempo e que debe liderar o Concello. Dixo que o xeito de abordalo será establecendo un plan que ten tres vertentes. Por unha banda, avanzar na rexeneración urbana, algo que xa está facendo a Administración local. Por outra, traballar en distintas posibilidades para xestionar as vivendas, algo que se debe “analizar con todos os grupos políticos”. Finalmente, “reforzar o control e a vixilancia” para evitar os problemas de convivencia e as ocupacións.
Este último aspecto, o do aumento da presenza policial no barrio, centrou parte da reunión. “O escenario a curto prazo pasa por reforzala”, asegurou o rexedor ferrolán, que lembrou que a Policía Local está en proceso de incrementar o seu número de efectivos. López-Rioboo mostrouse de acordo e avanzou que existe o “compromiso” de que o Corpo Nacional de Policía eleve a súa presenza en Recimil.
Para a subdelegada do Goberno, existe unha coincidencia no “diagnóstico”, pero recoñece que o traballo que se está facendo non terá reflexo de inmediato, xa que os problemas que se están enfrontando “son moitos”. “É imprescindible que traballemos coordinadamente para que o barrio sexa digno”, dixo. O obxectivo, abundou o alcalde, é que se vexan resultados cando menos “a medio prazo”.
