A alcaldesa de Narón, Marián Ferreiro, o voceiro de TEGA, Román Romero, e outros edís do grupo de goberno secundaron este mediodía, ás 12.00 horas, a concentración que tivo lugar na Praza de Galicia para reivindicar máis persoal e recursos nos centros sanitarios. Con carteis nos que se podía ler “Non podemos máis” representantes sanitarios do centro de saúde do Alto denunciaron a situación que están atravesando debido á crise da Covid-19 e ás dificultades coas que se atopan no día a día para poder desenvolver o seu traballo nas condicións óptimas.
A rexedora local trasladou o seu apoio e o do goberno local naronés ao colectivo e anunciou que no pleno que se celebrará este xoves se abordará unha moción dos grupos municipais Terra Galega, PSOE e BNG en apoio aos acordos da plataforma SOS Sanidade Pública de Galicia e para a mellora dos servizos da sanidade pública en Narón e na área sanitaria de Ferrol.
Entre as medidas que se reclaman da administración autonómica están ter acceso a unha información transparente sobre a pandemia, incrementar o orzamento sanitario, repoñer recursos que foron suprimidos en Atención Primaria, aumento de persoal… anunciando que se solicitará unha entrevista co Conselleiro de Sanidade para plantexarlle estes e outros asuntos.
No referente á cidade, Ferreiro explicou que tamén a través desta moción se insta á Xunta de Galicia a solucionar o problema da Praza de Galicia para poder acceder ao centro de saúde, evitando aglomeracións de persoas no exterior do edificio á espera do seu turno e reforzar a atención telefónica na cita previa e no PAC de Narón.
“Son vellas reivindicacións das nosas veciñas e veciños e que contan con todo o respaldo do goberno local, que en reiteradas ocasións lle trasladou, sen éxito, estas demandas a representantes da Área Sanitaria”, asegurou a alcaldesa. Así mesmo, en canto a Narón reclamarase á Xunta unha Unidade de Psicoloxía clínica para o novo centro de saúde e un servizo permanente de Cirurxía vascular na Área Sanitaria de Ferrol.
