O salón de actos da Casa da Cultura de Neda acollerá este sábado 31 de outubro ás 18.30 horas a obra “O Camiño da lingua”, da compañía Galeatro. Dirixida a nenos e nenas a partir de 4 anos e ás súas familias, este espectáculo teatral inclúese no programa de dinamización lingüística Falaredes, no marco do Fondo de Proxectos Culturais Xacobeo 2021.
A entrada é de balde, con inscrición previa ata o venres chamando ao teléfono 981 39 02 33 en horario de mañá de 10.00 a 13.00 horas e de tarde de 17.00 a 20.00 horas. As prazas están moi limitadas por mor dos protocolos de prevención fronte á Covid-19 por unha cultura segura.
Na obra, atoparemos a Xan, que quere participar no concurso O Camiño da lingua coa intención de gañar o gran premio final. Para iso terá que superar unha serie de probas relacionadas co Camiño de Santiago, coa cultura e coa literatura galega. Pero el só non é quen de superar todos os retos e solicita a axuda do público.
