RTVE dará un paso histórico esta fin de semana ao ofrecer por primeira vez na súa historia a narración en galego dun partido da Selección Española masculina de fútbol. Os espectadores de Galicia poderán seguir en lingua galega os decisivos encontros de clasificación para o Mundial de 2026 que España disputará este sábado fronte a Xeorxia e o vindeiro martes ante Bulgaria.
As emisións permitirán escoller a opción de audio en galego a través da segunda pista dispoñible nos televisores, ou ben manter a narración habitual en castelán. Con esta iniciativa, RTVE busca «reforzar o seu compromiso co multilingüismo e coas linguas cooficiais do Estado».
A narración en galego correrá a cargo de Carlos Jiménez, habitual narrador de grandes eventos deportivos en RNE, e Enrique Morales, redactor de deportes de RTVE en Vigo. As achegas técnicas virán da man de Manel Fernández Anidos, exfutbolista internacional sub-21 coa selección española, que militou en equipos como o Celta ou o Racing de Ferrol, e pertence a unha coñecida saga de futbolistas galegos.
O España–Xeorxia disputarase este sábado, 11 de outubro, ás 20:45 horas no estadio Martínez Valero de Elxe, mentres que o España–Bulgaria celebrarase o martes 14 de outubro en Valladolid, tamén ás 20:45 horas.
Ademais, o encontro do martes poderá seguirse tamén a través de La 2Cat, que comeza as súas emisións o luns 13 e volverá ofrecer os partidos da Selección Española e da Copa do Rei en catalán, coa narración de David Figueira e Chapi Ferrer.
