A Deputación de Lugo impulsa unha programación feminista que se desenvolverá nos meses de abril e maio con actividades gratuítas dirixidas tanto aos concellos como á comunidade educativa. A presidenta, Carmela López, e a deputada de Muller e Igualdade, Marisol Morandeira, foron as encargadas de dar a coñecer estas iniciativas, co obxectivo de “informar, conectar coa cidadanía, facer pensar e contribuír a desmontar prexuízos”.
A iniciativa busca dar resposta institucional ante o repunte de actitudes e discursos machistas, o que lles obriga «como institución pública, a actuar con responsabilidade», reivindicando o feminismo como “a defensa da igualdade real entre mulleres e homes”.
Vilalba como punto de partida
Vilalba foi a primeira en acoller unha das accións principais da inciativa: Risas con perspectiva feminista, un ciclo de espectáculos de humor protagonizado por Arantxa Treus e Jazmín Abuín. O dúo cómico ‘Sobria e Serena’ inicia o periplo pola provincia de Lugo poñendo o feminismo ao alcance de todas e todos cun humor comprometido, percorrendo tamén Foz, o venres 15 de maio; Taboada; o domingo 16 de maio; e Sarria o domingo 24 de maio.
A divulgación como eixe central
Por outra banda, o venres 17 de abril celebrarase no Salón de Actos da Deputación a xornada Feministas=Igualdade, conducida pola presentadora lucense Beatriz Serén e na que participarán investigadoras, psicólogas e expertas en comunicación para analizar os retos actuais en materia de igualdade.
A actividade, tamén de balde e dirixida aos centros educativos, desenvolverase no Salón de Actos do Pazo de San Marcos a partir das 9:00 horas, mais para asistir será necesario inscribirse previamente a través do correo electrónico [email protected].
Ao longo da mañá, diversas relatoras de referencia combinarán coñecemento e reflexión con achegas de carácter máis emocional. Entre elas, destaca Eulalia Pérez Señedo, profesora de investigación no CSIC, que afondará nos estereotipos e nas falsas crenzas científicas sobre as mulleres. Laura Redondo, doutora en psicoloxía, analizará os mitos arredor da igualdade, e Celia de Marcos, doutora en comunicación, abordará o impacto da intelixencia artificial neste ámbito.
Tamén participarán Cristina Pérez Carmuega e Seila Couso-Pérez, investigadoras no eido educativo e científico, que tratarán a invisibilización histórica das mulleres a través do coñecido ‘efecto Matilda’. A xornada concluirá cun monólogo da cómica Esther Gimeno, que achegará unha perspectiva máis próxima e participativa ao público.
