O nomeamento da nova directora do Centro Galego de Arte Contemporánea (CGAC), Eva López Tarrío, desencadeou que artistas, comisarios, profesorado universitario e forzas políticas coincidan en cualificar o suceso como problemático, abrindo un debate sobre o modelo de xestión cultural en Galicia.
A orixe do conflito está na forma en que se levou a cabo a selección. A convocatoria limitouse a persoal funcionario e desenvolveuse mediante un sistema de libre designación, un modelo legal pero que deixou fóra boa parte do ecosistema profesional do arte contemporáneo. Outra das claves da polémica é o perfil da persoa escollida. López Tarrío conta cunha traxectoria vinculada ao ensino e a proxectos expositivos de menor escala, algo que parte da comunidade artística considera insuficiente para dirixir unha institución de referencia.
Protestas, dimisións e presión institucional
O desacordo fixose visible de inmediato, con protestas no propio CGAC coincidindo con actos institucionais, nas que se cuestionaban tanto o nomeamento como a orientación futura do museo. Entre as críticas máis repetidas figura a idea de que o proceso estivo excesivamente influído pola administración, o que alimenta as dúbidas sobre a independencia do centro.
A tensión incrementouse coas dimisións de varios membros do Consello Asesor, interpretadas como unha mostra clara do rexeitamento interno. O conflito estendeuse despois ao ámbito académico, co departamento de Historia da Arte da Universidade de Santiago reclamando a anulación da convocatoria e a apertura dun novo proceso baseado en criterios de mérito e transparencia. A polémica chegou tamén ao plano político, onde os grupos da oposición no Parlamento galego pediron revisar a designación e avanzar cara a un modelo de elección máis aberto, participativo e independente.
A xunta mantense na súa decisión
En paralelo ás críticas, a Xunta mantén a súa posición e defende a legalidade do procedemento, asegurando que responde a criterios de mérito e capacidade. Ademais, anunciou a intención de abrir unha nova etapa no CGAC cun plan estratéxico a medio prazo. A crise do CGAC continúa en desenvolvemento, cunha tensión que non parece diminuír a curto prazo. O nomeamento xa é oficial, pero o desacordo segue presente tanto na rúa como nas institucións.
