O Orgullo 2026 está a encher de actividades culturais, reivindicativas e festivas distintas cidades galegas ao longo do mes de xuño e comezos de xullo, cun programa diverso que combina música, artes escénicas, encontros cidadáns e actos institucionais. Santiago de Compostela, Ourense, A Coruña, Vigo e Pontevedra son algunhas das cidades que manteñen unha axenda ampla e descentralizada.
Pontevedra : un programa transversal
O concello de Pontevedra fixo público o programa do Orgullo 2026, cun calendario que se estende durante varios días e que inclúe propostas culturais, accións educativas e eventos co obxectivo de dar visibilidade á diversidade en distintos espazos urbanos
Vigo: Nós mesmas e Avante impulsan unha axenda diversa
A diferenza do resto das cidades, Vigo non celebrará este ano a Festa Diversxs, que foi suspendida segundo informaron as entidades organizadoras. A cancelación xerou debate na cidade, ao tratarse dun evento alternativo e autoxestionado que nos últimos anos se consolidara como un espazo de expresión. As entidades Nós mesmas e Avante impulsan unha axenda que combina a diversión coa concienciación e a reivindicación.
Santiago de Compostela: cultura e reivindicación
Santiago de Compostela celebra un ano máis unha nova edición de Compostela Diversa, unha programación promovida polo Concello que aposta pola visiblidade, inclusión e a diversidade a través de actividades culturais e sociais. A iniciativa inclúe propostas abertas como charlas, obradoiros e eventos co obxectivo de crear espazos seguros arredor da diversidade afectivo-sexual e de xénero.
Ferrol: Novas lecturas da man de Trémola Teatro
A biblioteca municipal de Ferrol presenta unha nova edición dos Instantes Literarios dedicado á literatura LGTBI+. O día 19 de xuño, de 11.30 a 13.30 h da mañá e de 17.00 a 19.00 h da tarde, proponse a entrada da biblioteca para atopar novas lecturas da man de Trémola Teatro que promoven o respecto á diversidade.
Ourense: un gran espectáculo na Praza Maior
Ourense volverá a converter a Praza Maior nun dos epicentros do Orgullo en Galicia co evento de OUrgullo que contará coa actuación de Azúcar Moreno, varias artistas drag e rematará con DJ. A programación complétase con actividades paralelas que reforzan a mensaxe da igualdade e respecto.
Coruña: volve o Atlantic Fest
Un ano máis celébrase o Festival LGBTIQ+ Atlantic Fest gratuíto na cidade da Coruña do 5 ao 12 de xullo de 2026 coas grandes Azúcar Moreno, Soraya, María Isabel, Jorge González, Oro Jondo, Dennis Moore, o Coro Cores e nas cabinas DJ Paola, DJ 90, DJ Cés, DJ Flashback e DJ Licho. Xuntarase o pop, eurodance e drags para cantar e bailar nunha semana especial.
A diversidade de formatos e enfoques nas celebracións do Orgullo 2026 reflicte a pluralidade do movemento en Galicia, con propostas institucionais, culturais e comunitarias que conviven nun mesmo calendario.
