Para conmemorar o Día internacional contra a violencia de xénero o Concello de Foz organiza unha concentración este venres, día 25, con lectura dun manifesto e tamén de textos por parte do alumnado do IES de Foz contra a violencia de xénero e na defensa dos dereitos das mulleres de todo o mundo. Este mesmo día terá lugar a inauguración dun banco violeta “para a reflexión e rexeite da violencia de xénero, símbolo da unión de toda a cidadanía na loita contra o maltrato e a violencia machista». A continuación haberá unha concentración na Praza do Concello as 17:30 horas, con lectura do manifesto contra a violencia de xénero. Participará o alumnado do IES de Foz, que procederán ás lecturas dos textos que forman parte do traballo que desenvolveron de cara ó 25N.
No mesmo acto, recordando ás mulleres asasinadas e ós seus fillos, procederase á colocación dun panel en negro onde figurarán os seus nomes, en sinal de respecto e homenaxe póstumo as vítimas. Ó remate gardarase un minuto de silencio polas vítimas”. En próximas datas o Concello inaugurará un segundo banco violeta para crear espazos de reflexión e visibilizar no mobiliario urbano o rexeite da violencia de xénero, «na procura do respecto e da igualdade en todo o pobo de Foz». E dentro destes actos os días 12 e 14 de decembro impartirase un curso de autodefensa persoal para mulleres, ensinando técnicas para zafarse ante situacións violentas. As interesadas poden contactar co departamento municipal de Servizos Socias no teléfono 982.13.35.66”.
A concelleira focega Ana Rojo fixo fincapé na labor do alumnado do IES de Foz, nenas e nenos de 1º a 4º da ESO, que realizaron mural contra as violencias que se dan sobre as mulleres de todo o mundo. Dito mural estará exposto ao público en xeral diante da Casa do Concello, sumándose así ós actos de conmemoración do 25N.
